ଭୁବନେଶ୍ବର: ଫନିକୁ ବର୍ଷେ । 2019 ଠିକ୍ ଆଜିର ଦିନରେ ରାଜ୍ୟରେ ପ୍ରଳୟ ରଚିଥିଲା ‘ଫନି’ । 1999 ମସିହା ମହାବାତ୍ୟା ପରେ ଏଭଳି ଏକ ବଡ ବିପଦକୁ ସାମ୍ନା କରିଥିଲା ଓଡିଶା । ପୁରୀ ଉପକୂଳରେ ସ୍ଥଳଭାଗ ଛୁଇଁବା ପରେ ପୁରୀ ଓ ଭୁବନେଶ୍ବରକୁ କରିଥିଲା ଛାରଖାର । ଗାଁଠୁ ସହର ସବୁକିଛି ଫନି ଫଣାରେ ଧ୍ବଂସ ବିଧ୍ବଂସ ହୋଇଯାଇଥିଲା ।
‘ଫନି’କୁ ବର୍ଷେ, ଏବେ ବି ମନରୁ ଲିଭିନି ସେ ଦୃଶ୍ୟ
ବଡ ବଡ ଗଛଠୁ ଆରମ୍ଭ କରି ବିଦ୍ୟୁତ୍ ଖୁଣ୍ଟ ରାସ୍ତାରେ ଶୋଇଯାଇଥିଲା । ହଜାର ହଜାର ଲୋକ ବାସହରା ହୋଇଯାଇଥିଲେ । ତେବେ ଆଜି ଫନିକୁ ବର୍ଷେ ପୂରିଥିବାବେଳେ ଆଜି ବି ଲୋକଙ୍କ ମନରୁ ଲିଭିନି ସେ କରାଳ ଦୃଶ୍ୟ । ପୁରୀରେ ଲ୍ୟାଣ୍ଡଫଲ କରିବା ପରେ ପୁରୀ-କୋଣାର୍କ ବାଲୁଖଣ୍ଡ ସଂରକ୍ଷିତ ଅଭୟାରଣ୍ୟରେ ହଜାର ହଜାର ଗଛ ଉପୁଡି ପଡିଥିଲା । ଶ୍ରୀହୀନ ହୋଇଥିଲା ଶ୍ରୀକ୍ଷେତ୍ର । ରାଜଧାନୀରେ ରାଜ କରୁଥିଲା ଫନି । କେଉଁଠି ଘର ଭାଙ୍ଗୁଥିଲା ତ କେଉଁଠି ମୋବାଇଲ ଟାୱାର ଖୁଣ୍ଟି ।