ଭୁବନେଶ୍ବର: ଚେହେରା ଦେଖାଇ ମୋହରା। ମିଠା ମିଠା କଥା କହି ଚାକିରି ଦେବା ନାଁରେ ଠକେଇ। କନସଲଟାନ୍ସି ଅଫିସ ଖୋଲି ଚାକିରି ଦେବା ନାରେ ରେଜିଷ୍ଟ୍ରେସନ ଫି ଆଳରେ ଲୁଟୁଛନ୍ତି ଲକ୍ଷ ଲକ୍ଷ ଟଙ୍କା । ଏମିତି ଢଙ୍ଗରେ ମଞ୍ଚେଶ୍ବର ଥାନା ଅଞ୍ଚଳରୁ ୨ ଲକ୍ଷ ଠକେଇ କରିଥିବା ଠକକୁ କାବୁ କରିଛି ମଞ୍ଚେଶ୍ବର ଥାନା ପୋଲିସ। ଠକେଇ କରିଥିବା ସୁନ୍ଦରୀ ଓଡିଶା ଛାଡି ଫେରାର ପାଇଁ ଉଦ୍ୟମ କରୁଥିବାବେଳେ ଏୟାରପୋର୍ଟରୁ ଯୁବତୀକୁ କାବୁ କରିଛି ପୋଲିସ। ଯୁବତୀର ସୁଚନା ଆଧାରରେ ଏହା ପଛର ମାଷ୍ଟରମାଇଣ୍ଡ ଅନିଲ ସାହୁକୁ ମଧ୍ୟ ଗିରଫ କରିଛି ପୋଲିସ।
ତେବେ ଏମାନେ ଠକେଇ ପାଇଁ ଏକ ପ୍ଲାନ ରଚିଥିଲେ। ମଞ୍ଚେଶ୍ବର ଥାନା କୋଚିଲେଇ ହାଟ ନିକଟ ଓମକାର ବିଜନେସ ନାଁରେ ଏକ କନସଲଟାନ୍ସି ଅଫିସ ଖୋଲିଥିଲେ। ମାଷ୍ଟରମାଇଣ୍ଡ ଅନିଲ ସାହୁ ଦିଲ୍ଲୀର ଏକ ଯୁବତୀକୁ ସେଠାରେ କାଉନସେଲର ଭାବେ ବୁଝାସୁଝା କରୁଥିଲେ। ଅର୍ଥାତ ସମସ୍ତ ଵେକାର ଯୁବକଯୁବତୀଙ୍କ ଡାଟା ସଂଗ୍ରହ କରୁଥିଲେ ଅନିଲ। ସେହି ଡାଟାକୁ ଆଧାରକରି ସେମାନଙ୍କ ପାଠ ପଢିଵାର ଡିଗ୍ରି ଅନୁସାରେ ଚାକିରୀ ଅଫର କରୁଥିଲେ ସୁନ୍ଦରି ତରୁଣୀ ଜଣକ।
ଏପରିକି ଯେଉଁ ପିଲା ରେଫରେନସରେ ଆସୁଥିଲେ ସେମାନଙ୍କୁ ମଧ୍ୟ ବିଭିନ୍ନ କମ୍ପାନୀରେ ତାଙ୍କ ଦ୍ଵାରା ଚାକିରି ପାଇଥିବା ପିଲାଙ୍କ ଫଟୋ ଦେଖାଇ ବିଶ୍ଵାସ ଜନ୍ମାଉଥିଲେ । ମାଟ୍ରିକ ଫେଲ ଠାରୁ ଆରମ୍ଭ କରି ବିଟେକ ପର୍ଯନ୍ତ ବେକାର ଯୁବପିଢିଙ୍କୁ ଚାକିରି ଲାଳସା ଦେଖାଇ ପ୍ରଥମେ ରେଜିଷ୍ଟ୍ରେସନ ଫି ୧୦୦୦ଟଙ୍କା ଓ ପରେ ଜଣକ ପିଛା ୧୦ରୁ ୧୫ହଜାର ଲେଖାଏଁ ନେଉଥିଲେ। ନାମିଦାମୀ ଟେଲିକମ କମ୍ପାନୀର ସେଲସ ଓ ସର୍ଭିସ ସହ ରିଟେଲ ଆଉଟଲେଟ ଓ ବିଭିନ୍ନ କମ୍ପାନୀର ଅଫିସ ଆସିଷ୍ଟାଣ୍ଟ ଆଦି ଚାକିରିର ଭରସା ଦେଖାଇ ଟଙ୍କା ସଗ୍ରହ କରୁଥିଲେ।