ଭୁବନେଶ୍ବର: ସାବଧାନ ରାଜଧାନୀବାସୀ । ସାଧୁସନ୍ଥ ବେଶରେ ବୁଲୁଛନ୍ତି ଭଣ୍ଡ ବାବା । ଯେକି ନିଜର ବେଶ ପୋଷାକ ଓ ଚତୁରତାରେ ଫଶାଇ ଲୋକଙ୍କୁ ବୁଲାଉଛନ୍ତି କଳାକନା । ମୁଣ୍ଡରେ ବିଭୂତି ଓ ଚାମର ମାରି ଲୁଟିନେଉଛନ୍ତି ସର୍ବସ୍ବ । ଠାକୁରଙ୍କ ନାଁରେ ଲୋକଙ୍କ ଘର ଘର ବୁଲି ଭିକ୍ଷାବୃତ୍ତି ଆଳରେ କରୁଛନ୍ତି ଏଭଳି କାମ । ଏମିତି ଏକ ଅଭିଯୋଗ ହୋଇଛି ରାଜଧାନୀ ଭୁବନେଶ୍ବର ସ୍ଥିତ ଚନ୍ଦ୍ରଶେଖରପୁର ଥାନାରେ । ଅଭିଯୋଗ ପରେ କମିଶନରେଟ୍ ପୋଲିସ 2 ଜଣ ଭଣ୍ଡବାବା ରାଜା ଯୋଗୀ ଓ ସୁରେଶ ଯୋଗୀକୁ ଗିରଫ କରିଛି ।
ସୂଚନାମୁତାବକ, ଗତ ଜୁଲାଇ ୧୬ ତାରିଖରେ ଚନ୍ଦ୍ରଶେଖରପୁର ଥାନା ଡମଣା ଅଞ୍ଚଳର ରବୀନ୍ଦ୍ର ମଲିକଙ୍କ ଘରେ ପହଞ୍ଚିଥିଲେ ଏହି ଦୁଇ ଭଣ୍ଡ ବାବା । ରବୀନ୍ଦ୍ରଙ୍କ ଝିଅ ଦେହ ଭଲ ନଥିବା ଦେଖି ଏହାର ସୁଯୋଗ ଉଠାଇ ଉଭୟ ତାଙ୍କ ସ୍ତ୍ରୀ ସହ କଥା ହୋଇଥିଲେ । ଏହା ପରେ ବାବାଙ୍କ ବିଭୂତି କହି ତାଙ୍କ ସ୍ତ୍ରୀ ମୁଣ୍ଡରେ ମାରି ସବୁ କିଛି ଠିକ୍ ହେବାର ଆଶ୍ବସନା ଦେଇଥିଲେ । ଆଉ ଚାମରରେ ଝାଡି ଦେଇ ଆଖିବୁଜ କହି ତାଙ୍କ ଘରେ ଥିବା ଦୋକାନର ବାକ୍ସରୁ ୩୫୬୦ ଟଙ୍କା ନେଇ ଛୁ ହୋଇଥିଲେ ।