ଇଟିଭି ଭାରତ ମହାପ୍ରଭାବ: କଥା ରଖିଲେ ନବୀନ, ଲିପୁନାଙ୍କୁ ମିଳିଲା ଘର

ଇଟିଭି ଭାରତର ମହାପ୍ରଭାବ । ଖବର ପ୍ରସାରଣ ହେବା ପରେ ଭାଙ୍ଗିଛି ପ୍ରଶାସନର ନିଦ । ଆଉ ହିତାଧିକାରୀଙ୍କୁ ମିଳିଛି ବିଜୁ ପକ୍କା ଘର । ତେଣେ ସ୍ବପ୍ନ ପୂରା ହେବା ନେଇ ଖୁସିରେ ଫାଟିପଡିଛି ଦିବ୍ୟାଙ୍ଗ ଲିପୁନାଙ୍କ କୋହ ।

ଭୁବନେଶ୍ବର: ଇଟିଭି ଭାରତର ମହାପ୍ରଭାବ । ଖବର ପ୍ରସାରଣ ହେବା ପରେ ଖୋଲିଛି ପ୍ରଶାସନର ନିଦ ଓ ହିତାଧିକାରୀଙ୍କୁ ମିଳିଛି ପ୍ରାପ୍ୟ ବିଜୁ ପକ୍କା ଘର । ତେଣେ ସ୍ବପ୍ନ ପୂରା ହେବା ନେଇ ଖୁସିରେ ଫାଟିପଡିଛି ଦିବ୍ୟାଙ୍ଗ ଲିପୁନାଙ୍କ କୋହ । ଶେଷରେ ପୂରଣ ହୋଇଛି ମୁଖ୍ୟମନ୍ତ୍ରୀ ଦେଇଥିବା ପ୍ରତିଶୃତି ଓ ପୂରା ହୋଇଛି ଦୀର୍ଘ ଦିନର ସ୍ବପ୍ନ । ଏବେ ମୁହଁରେ କେବଳ ଗୋଟିଏ ଶବ୍ଦ ‘ଧନ୍ୟବାଦ ଇଟିଭି ଭାରତ’ ।

ପେଟ ଚାଖଣ୍ଡକ ପାଇଁ ସେ ନିତି ଧାଇଁଯାଆନ୍ତି କଟକ ବାଦାମବାଡି ବସ୍‌ଷ୍ଟାଣ୍ଡ । ଦିନେ ନରସିଂହପୁର ଅଞ୍ଚଳରେ ଭେଟ ହେଲେ ନିର୍ବାଚନୀ ପ୍ରଚାରରେ ଆସିଥିବା ମୁଖ୍ୟମନ୍ତ୍ରୀ । କାଳ ବିଳମ୍ବ ନ କରି ମୁଖ୍ୟମନ୍ତ୍ରୀଙ୍କ ଗାଡି ପଛରେ ଧାଇଁ ଯାଇଥିଲେ ଦିବ୍ୟାଙ୍ଗ ଲିପୁନା । କହି ବସିଥିଲେ ଅନ୍ତରର ବେଦନା । ଭାବିଥିଲେ ଦୁଃଖ ବୁଝିବେ ବଡ ବାବୁ । ଆଶା ମୁତାବକ ପ୍ରତିଶୃତି ମଧ୍ୟ ଦେଲେ ମୁଖ୍ୟମନ୍ତ୍ରୀ । ହେଲେ ପ୍ରତିଶୃତିକୁ 6 ମାସ ବିତିଥିଲେ ବି ନା ମିଳିଲା ପକ୍କା ଘର, ନା ମିଳିଲା କିଛି ଖୋଜ ଖବର ।

ଏନେଇ କିଛି ଦିନ ତଳେ ଇଟିଭି ଭାରତରେ ଖବର ପ୍ରସାରଣ ହେବା ପରେ ଲିପୁନାଙ୍କ ମୁହଁରେ ଫୁଟିଛି ଖୁସିର ହସ । ସତ ହୋଇଛି ସ୍ବପ୍ନ ଓ ପୂରଣ ହୋଇଛି ବିଜୁ ପକ୍କା ଘରର ପ୍ରତିଶୃତି । ସାଥୀରେ ମିଳିଛି ରାଜ୍ୟ ସରକାରଙ୍କ ତରଫରୁ ସହାୟତା ରାଶି । ଇଟିଭି ଭାରତର ଏହି ପ୍ରୟାସ ପାଇଁ ଏବେ କୃତ୍ୟ କୃତ୍ୟ ହୋଇଛନ୍ତି ଲିପୁନା ।

ଭୁବନେଶ୍ବରରୁ ଶତରୂପା ସାମନ୍ତରାୟ, ଇଟିଭି ଭାରତ