ଭୁବନେଶ୍ବର: ପ୍ରଧାନମନ୍ତ୍ରୀଙ୍କ ଦକ୍ଷତା ବିକାଶ ଯୋଜନା ଅଧୀନରେ ପୂର୍ବତଟ ରେଳପଥ ରେଳ ଦକ୍ଷତା ବିକାଶ ଯୋଜନା ଆରମ୍ଭ କରିଛି । ଏଥିରେ ଅଢେଇ ହଜାର ଯୁବକ ସାମିଲ ହୋଇଛନ୍ତି । ସର୍ବନିମ୍ନ ମାଟ୍ରିକ୍ ପାସ୍ ଯୋଗ୍ୟତା ଥିବା 18 ରୁ 35 ବର୍ଷ ବୟସର ପ୍ରାୟ 2500 ଯୁବକଙ୍କୁ ପୂର୍ବତଟ ରେଳପଥରେ ତିନି ବର୍ଷ ମଧ୍ୟରେ ମାଗଣା ତାଲିମ ଦେବାକୁ ନିଷ୍ପତ୍ତି ନେଇଛି ।
ବିଶାଖାପାଟନମ ଡିଜେଲ ଲୋକୋ ଶେଡ, ଅନୁଗୋଳ ଓ ବିଶାଖାପାଟନମ ସ୍ଥିତ ଇଲେକ୍ଟ୍ରିକ୍ ଲୋକୋ ଶେଡ୍ ଏବଂ ମଞ୍ଚେଶ୍ୱରରେ ଥିବା ରେଳବାଇ ସବାରୀ ଡ଼ବା ମରାମତି କର୍ମଶାଳାରେ ୱେଲଡିଂ, ଇଲେକ୍ଟ୍ରିସିଆନ ଏବଂ ଫିଟର ଟ୍ରେଡ଼ରେ ଏହି ତାଲିମ ଦିଆଯିବ ।
ଏହି ତାଲିମ ତିନି ସପ୍ତାହରେ 100 ଘଣ୍ଟା ମଧ୍ୟରେ କ୍ଲାସ୍ ଏବଂ ପ୍ରାକ୍ଟିକାଲ୍ ଟ୍ରେନିଂ ପାଇଁ ଧାର୍ଯ୍ୟ କରାଯାଇଅଛି । ସୋମବାରରୁ ଶୁକ୍ରବାର ପର୍ଯ୍ୟନ୍ତ ପୂର୍ବାହ୍ନ ୯ ଟା ରୁ ଅପରାହ୍ନ ୪ ଟା ପାର୍ଯ୍ୟନ୍ତ ଏବଂ ଶନିବାର ପୂର୍ବାହ୍ନ ୯ ଟା ରୁ ଅପରାହ୍ନ ଗୋଟାଏ ପର୍ଯ୍ୟନ୍ତ କ୍ଲାସ୍ ଏବଂ ପ୍ରାକ୍ଟିକାଲ୍ ଟ୍ରେନିଂ ଦିଆଯିବ । ଏହି ବିଷୟରେ ସବିଶେଷ ତଥ୍ୟ ପାଇଁ ପୂର୍ବତଟ ରେଳପଥ ୱେବସାଇଟ୍ ତଥା ସମ୍ପୃକ୍ତ ତାଲିମ କେନ୍ଦ୍ରରେ ଯୋଗାଯୋଗ କରିହେବ କିମ୍ବା ନିମ୍ନଲିଖିତ ଲିଙ୍କରେ ଆଶାୟୀ ପ୍ରାର୍ଥୀମାନେ ଅନୁକରଣ ଏବଂ ଡାଉନଲୋଡ୍ କରିପାରିବେ - https://eastcoastrail.indianrailways.gov.in ।
ବିଶାଖାପାଟନମ୍ ଏବଂ ଅନୁଗୋଳରେ ଇଲେକ୍ଟ୍ରିକାଲ ଲୋକୋ ଶେଡ୍ ପାଇଁ ଆବେଦନ ଦାଖଲ ଶେଷ ତାରିଖ 31 ଅଗଷ୍ଟ 2021 ଥିବାବେଳେ ବିଶାଖାପାଟନମ୍ ଡିଜେଲ୍ ଲୋକୋ ଶେଡ୍ ଏବଂ ମଞ୍ଚେଶ୍ୱର ସବାରୀ ଡ଼ବା ମରାମତି କର୍ମଶାଳା ପାଇଁ 3 ସେପ୍ଟେମ୍ବର, ୨୦୧୧ ତାରିଖ ଧାର୍ଯ୍ୟ କରାଯାଇଅଛି ।
ଭୁବନେଶ୍ବରରୁ ବିକାଶ କୁମାର ଦାସ, ଇଟିଭି ଭାରତ
