ଭୁବନେଶ୍ବର: ନିକଟରେ ମହାରାଷ୍ଟ୍ର ଔରଙ୍ଗାବାଦ ଟ୍ରେନ ଟ୍ରାଜେଡି ସମଗ୍ର ଦେଶକୁ ସ୍ତବ୍ଧ କରିଦେଇଛି । ଏହି ଘଟଣା ପରେ ସତର୍କ ହୋଇଛି ଭାରତୀୟ ରେଳବାଇ । ରେଲୱେ ଟ୍ରାକରେ ନଚାଲିବାକୁ ସମସ୍ତଙ୍କୁ ଅନୁରୋଧ କରିଛି ପୂର୍ବତଟ ରେଳବାଇ ।
ଅବୈଧ ଭାବରେ ରେଲୱେ ଟ୍ରାକ ଉପରେ ଚଳପ୍ରଚଳ କରୁଥିବା ବ୍ୟକ୍ତିଙ୍କୁ ଦେଖିଲେ ସତର୍କ କରିବାକୁ ରେଳ କର୍ମଚାରୀଙ୍କୁ ଅନୁରୋଧ କରିଛି ରେଳବାଇ । ଯଦି କୌଣସି ରେଲୱେ ଟ୍ରାକରେ ଲୋକେ ଚଳପ୍ରଚଳ କରୁଥାନ୍ତି ତେବେ ରେଳ ସୁରକ୍ଷା ବଳୟର ହେଲ୍ପ ଲାଇନ ନମ୍ବର 182କୁ ଜଣାଇବାକୁ ଅନୁରୋଧ କରିଛି ପୂର୍ବତଟ ରେଳବାଇ । କୋଭିଡ-19 ମୁକାବିଲା ପାଇଁ ଦେଶବ୍ୟାପୀ ଲାକଡାଉନ ଚାଲିଥିବାବେଳେ ସମସ୍ତ ଯାତ୍ରୀବାହୀ ଟ୍ରେନ ବାତିଲ ହୋଇଛି । ହେଲେ ଦେଶର ବିଭିନ୍ନ ପ୍ରାନ୍ତରରେ ଅତ୍ୟାବଶ୍ୟକ ସାମଗ୍ରୀ ପରିବହନ କରିବାକୁ ନିରବଛିନ୍ନ ଭାବେ ମାଲବାହୀ ଟ୍ରେନ ଓ ପାର୍ସଲ ଟ୍ରେନଗୁଡିକ ଚଳାଚଳ କରୁଛି ।