ଭୁବନେଶ୍ବର: ଓଡିଶାରେ ଶୁଭିଲାଣି ମରୁଡିର ପଦଧ୍ବନୀ । ମୌସୁମୀ ଆରମ୍ଭ ହୋଇଯାଇଥିଲେ ବି ପର୍ଯ୍ୟାପ୍ତ ପରିମାଣର ବର୍ଷା ହେଉନି । ତେଣୁ କିଛି ଅଞ୍ଚଳରେ ମରୁଡି ପରିସ୍ଥିତି ସୃଷ୍ଟି ହୋଇଛି । ବୁଧବାର ଭୋଗରାଇ ବିଧାୟକ ତଥା ପୂର୍ବତନ ମନ୍ତ୍ରୀ ଅନନ୍ତ ଦାସ ବିଧାନସଭାରେ ଏହି ପ୍ରସଙ୍ଗ ଉଠାଇ ସରକାରଙ୍କ ହସ୍ତକ୍ଷେପ ଦାବି କରିଛନ୍ତି ।
ଭୋଗରାଇର ଉଦାହାରଣ ଦେଇ ସେ କହିଥିଲେ ଯେ, ଗତ 2016 ଜୁନରୁ ଜୁଲାଇ 15 ତାରିଖ ମଧ୍ୟରେ ଭୋଗରାଇରେ 244.45 ମିଲିମିଟର ବର୍ଷା ହୋଇଥିଲା । 2017ରେ ଏହି ସମୟ ବେଳକୁ 364.10 ମିଲିମିଟର ଓ 2018ରେ 365. 51 ମିଲିମିଟର ବର୍ଷା ହୋଇଥିଲା । ଚଳିତ ବର୍ଷ କିନ୍ତୁ ଜୁଲାଇ 15 ତାରିଖ ସୁଦ୍ଧା 162.49 ମିଲିମିଟର ବର୍ଷା ହୋଇଛି । ଫଳରେ ତାଙ୍କ ଅଞ୍ଚଳରେ ତଳି ରୁଆ ହୋଇପାରୁନି କି ମଞ୍ଜି ବୁଣା ହୋଇପାରୁନି । ଏଭଳି ସ୍ଥିତି କେବଳ ଭୋଗରାଇ ଅଞ୍ଚଳରେ ନୁହେଁ ପଡୋଶୀ ବାଲେଶ୍ବର ଜିଲ୍ଲାରେ ମଧ୍ୟ ଏଭଳି ସ୍ଥିତି ସୃଷ୍ଟି ହୋଇଛି ବୋଲି ସେ ଉଦବେଗ ପ୍ରକାଶ କରିଛନ୍ତି ।
ଭୁବନେଶ୍ବରରୁ ଅଜିତ ଦାଶ, ଇଟିଭି ଭାରତ
