ଥଣ୍ଡା ଜ୍ବର ଥିଲେ ରଥଯାତ୍ରାକୁ ନଯିବାକୁ ଜନସ୍ବାସ୍ଥ୍ୟ ନିର୍ଦ୍ଦେଶକଙ୍କ ପରାମର୍ଶ

ପାଖେଇ ଆସୁଛି ମହାପ୍ରଭୁଙ୍କ ବିଶ୍ବପ୍ରସିଦ୍ଧ ଘୋଷଯାତ୍ରା । ଏଥିରେ ଅନେକ ଭକ୍ତ ସାମିଲ ହେବାକୁ ଥିବାରୁ ଥଣ୍ଡା ଜ୍ବର ଥିଲେ ପୁରୀ ନ ଯିବାକୁ ପରାମର୍ଶ ଦେଇଛନ୍ତି ଜନସ୍ବାସ୍ଥ୍ୟ ନିର୍ଦ୍ଦେଶକ । ଅଧିକ ପଢନ୍ତୁ

ଭୁବନେଶ୍ବର: ଆଉ କେଇଟା ଦିନ ମଧ୍ୟରେ ପୁରୀରେ ବିଶ୍ବପ୍ରସିଦ୍ଧ ରଥଯାତ୍ରା ଅନୁଷ୍ଠିତ ହେବାକୁ ଯାଉଛି । ଏହାରି ମଧ୍ୟରେ ରାଜ୍ୟରେ କୋରୋନା ସଂକ୍ରମଣ ବଢୁଛି । ଦୈନିକ ସଂକ୍ରମଣ ୧୦୦ ମୁହାଁ ହୋଇଥିବା ବେଳେ ଥଣ୍ଡା ଜ୍ବର ଥିଲେ ପୁରୀ ରଥଯାତ୍ରାକୁ ନ ଯିବାକୁ ଜନସ୍ବାସ୍ଥ୍ୟ ନିର୍ଦ୍ଦେଶକ ନିରଞ୍ଜନ ମିଶ୍ର ପରାମର୍ଶ ଦେଇଛନ୍ତି ।

ରାଜ୍ୟରେ କୋରୋନା ସଂକ୍ରମଣ କିଛି ଦିନହେଲା କ୍ରମାଗତ ଭାବରେ ବଢ଼ିବାରେ ଲାଗିଛି । ଆଗକୁ ରଥଯାତ୍ରା ଆସୁଛି । ତେଣୁ ସଂକ୍ରମଣ ବଢିବା ନେଇ ଆଶଙ୍କା କରାଯାଉଛି । ରାଜ୍ୟରେ ଏବେ ଦୈନିକ ସଂକ୍ରମଣ ଶହେ ମୁହାଁ ହେବାକୁ ଯାଉଛି । ରାଜ୍ୟର ସଂକ୍ରମଣର ସ୍ଥିତି ରାଜ୍ୟବାସୀଙ୍କ ପାଇଁ ସତର୍କ ଘଣ୍ଟି ସଦୃଶ୍ୟ ହୋଇପଡିଛି । ଏନେଇ ରାଜ୍ୟ ସରକାର କଣ ଗାଇଡଲାଇନ ଆଣୁଛନ୍ତି ତାହା ଏବେ ସମସ୍ତଙ୍କର ନଜର।

"ଯଦି କାହାର ଥଣ୍ଡା ଜ୍ବର ଭଳି ଲକ୍ଷଣ ଦେଖାଯାଉଛି ସେମାନେ ପୁରୀ ରଥଯାତ୍ରାକୁ ଯାଆନ୍ତୁ ନାହିଁ। ଯେଉଁ ମାନେ ଯାଉଛନ୍ତି ସେମାନେ ମାସ୍କ ସହିତ ସାନିଟାଇଜର ବ୍ୟବହାର କରନ୍ତୁ । ଯେଉଁମାନଙ୍କର ଥଣ୍ଡା ଜ୍ବର ହେଉଛି ସେମାନେ ସଙ୍ଗେ ସଙ୍ଗେ ଟେଷ୍ଟ କରନ୍ତୁ । ରାଜ୍ୟରେ ଟେଷ୍ଟିଂ ପାଇଁ ମଧ୍ୟ ମାନବସମ୍ବଳ ବଢ଼ାଇ ଦିଆଯାଇଛି" ବୋଲି ଜନସ୍ବାସ୍ଥ୍ୟ ନିର୍ଦ୍ଦେଶକ କହିଛନ୍ତି ।

ଆଗକୁ ରଥଯାତ୍ରା ଥିବାରୁ ଲକ୍ଷ ଲକ୍ଷ ଲୋକ ସେଠାରେ ସମାଗମ ହେବାର ସମ୍ଭାବନା ରହିଛି । ତେଣୁ ପୁରୀରେ ଅଧିକ ଟୀକାକରଣ କରାଯିବ ବୋଲି ସ୍ବାସ୍ଥ୍ୟ ବିଭାଗ ପୁରୀ ପ୍ରଶାସନକୁ ଅବଗତ କରାଯାଇଛି । ଯେଉଁ ମାନେ ଦ୍ବିତୀୟ ଡୋଜ ବା ପ୍ରିକସନ ଡୋଜ ନେଇନାହାନ୍ତି ସେମାନଙ୍କୁ ଏକ ସ୍ବତନ୍ତ୍ର କ୍ୟାମ୍ପ କରି ଟିକା ନେଇପାରିବେ ବୋଲି କିଛିଦିନ ପୂର୍ବରୁ ସ୍ବାସ୍ଥ୍ୟବିଭାଗ ପୁରୀ ପ୍ରଶାସନକୁ ଅବଗତ କରାଇଛି ।

ଇଟିଭି ଭାରତ, ଭୁବନେଶ୍ବର