ଭୁବନେଶ୍ବର:ଆଜି ପବିତ୍ର ଜନ୍ମାଷ୍ଟମୀ । ଭଗବାନ ଶ୍ରୀକୃଷ୍ଣଙ୍କ ଜନ୍ମୋତ୍ସବ । ଆଜି ମଧ୍ୟରାତ୍ରରେ ଧରାବତଣ କରିବେ ପ୍ରଭୁ ଶ୍ରୀକୃଷ୍ଣ ।ଦେଶବ୍ୟାପି ଏ ଉତ୍ସବକୁ ବେଶ ଧୁମଧାମରେ ପାଳନ କରାଯାଉଛି । ବିଭିନ୍ନ ମନ୍ଦିରରେ ବହୁ ଆଡମ୍ବରରେ ପାଳିତ ହେଉଛି କୃଷ୍ଣ ଜନ୍ମୋତ୍ସବ । ଶ୍ରୀକୃଷ୍ଣଙ୍କ ଜନ୍ମସ୍ଥାନ ମଥୁରାନଗରୀଠାରୁ ଆରମ୍ଭ କରି ଜଗନ୍ନାଥଧାମ ପୁରୀ ପର୍ଯ୍ୟନ୍ତ ସବୁଠି ଉତ୍ସାହର ମାହୋଲ । ଏହି ପୂଣ୍ଯ ତିଥିରେ ଭୁବନେଶ୍ବରର ଇସ୍କନ ମନ୍ଦିରରେ ମଧ୍ୟ ଶ୍ରୀକୃଷ୍ଣ ଜନ୍ମୋତ୍ସବ ପାଳିତ ହେଉଛି । ଇସ୍କନରେ ଭୋରରୁ ସ୍ୱତନ୍ତ୍ର ରୀତିନୀତି ଅନୁସାରେ ପୂଜାର୍ଚ୍ଚନା କରାଯାଇ ସାଧାରଣ ଦର୍ଶନ କରୁଛନ୍ତି ଭକ୍ତ ।
ସକାଳୁ ସକାଳୁ ଇସ୍କନ ମନ୍ଦିରରେ ଭକ୍ତଙ୍କ ଭିଡ ଦେଖିବାକୁ ମିଳିଥିଲା । ଶ୍ରଦ୍ଧାଳୁ ହାତରେ ପୂଜା ଥାଳି ନେଇ ଭଗବାନଙ୍କ ଦର୍ଶନ କରୁଛନ୍ତି । କିଏ ପ୍ରଭୁଙ୍କୁ ହାତଟେକି ମୁଣ୍ଡିଆ ମାରୁଛି ତ ଆଉ କିଏ ହରେକୃଷ୍ଣର ତାଳେ ତାଳେ ପ୍ରଭୁଙ୍କୁ ଦୁଇହାତ ଟେକି ନାଚିଯାଉଛି। ତେଣୁ ପୂରା ପରିବେଶ ଭକ୍ତିମୟ ହୋଇଥିବା ବେଳେ ଶ୍ରଦ୍ଧାଳୁମାନେ ଶ୍ରୀକୃଷ୍ଣଙ୍କ ଦର୍ଶନ କରି ବେଶ ପରମାନନ୍ଦ ଲାଭ କରୁଛନ୍ତି ।