ଭୁବନେଶ୍ବର: ଆଲୋକର ପର୍ବ ଦୀପାବଳି । ଅନ୍ଧାର ଉପରେ ଆଲୋକର ବିଜୟ ଏହି ପର୍ବ । ଘରେ ମାଟିଦୀପ ଲଗାଇ ଏହିଦିନ ଅନ୍ଧାରକୁ ଦୂର କରାଯାଇଥାଏ । କିନ୍ତୁ ଏଇ ମାଟି ଦୀପ ତିଆରି କରୁଥିବା କୁମ୍ଭାରଙ୍କ ଘର ଓ ତାଙ୍କ ଜୀବନର ଅନ୍ଧକାରକୁ ଦୂର କରିବାକୁ କେହି କେବେ ମଧ୍ୟ ଚିନ୍ତା କରନ୍ତି ନାହିଁ । ଏବେ ଆଧୁନିକତାର ଚାକଚକ୍ୟରେ ହଜି ଯାଉଛି ମାଟି ଦୀପ ଓ ତା'ର ଚାହିଦା । ବିଶେଷ କରି ସହରରେ ବସବାସ କରୁଥିବା ଲୋକେ ଏବେ ମାଟି ଦୀପରୁ ମୁହଁ ଫେରାଇ ନେଇ ଚାଇନା ଲାଇଟ ଆଡକୁ ମୁହାଁଉଛନ୍ତି । ଫଳରେ କୁମ୍ଭାର ହରାଉଛି ନିଜ ବେଉସା ।
ଚାଇନା ଲାଇଟରେ ହଜିଯାଉଛି ଦୀପ କାରିଗରଙ୍କ ଭବିଷ୍ୟତ
ଏମାନେ ହେଉଛନ୍ତି ରାଜଧାନୀ ଭୁବନେଶ୍ବରର ମାଟି କାରିଗର । ଦୀପାବଳୀ ପାଇଁ ତିଆରି କରୁଛନ୍ତି ଶହ ଶହ ମାଟି ଦୀପ । ମାତ୍ର ଏ ମାଟି ଦୀପ ବିକ୍ରି ହେବକି ନାହିଁ ତାକୁ ନେଇ ଚିନ୍ତାରେ କାରିଗର । ଗୋଟିଏପଟେ ଚାଇନା ଲାଇଟର ଚାହିଦା ଅନ୍ୟପଟେ କୋଲକାତାରୁ ଓଡିଶାକୁ ଆସୁଥିବା ମେସିନ୍ ତିଆରି ମାଟି ଦୀପ ଏହି କାରିଗରଙ୍କ ମୁଣ୍ଡରେ ଚଡ଼କ ପକାଉଛି ।