ଭୁବନେଶ୍ବର: ବରିଷ୍ଠ ବିଜେପି ନେତା ତଥା ରାଷ୍ଟ୍ରୀୟ ଉପସଭାପତି ବୈଜୟନ୍ତ ପଣ୍ଡାଙ୍କ ଉଦ୍ୟମରେ ସାଉଦି ଆରବରୁ ଓଡ଼ିଶା ଫେରିଲା ଯାଜପୁର ଜିଲ୍ଲାର ମୁକୁନ୍ଦ ପ୍ରସାଦ ଦାଶଙ୍କ ମୃତଦେହ । ବୁଧବାର ବିଳମ୍ବିତ ରାତିରେ ଭୁବନେଶ୍ବର ବିମାନ ବନ୍ଦରରେ ପହଁଞ୍ଚିଥିଲା ମୁକୁନ୍ଦଙ୍କ ମରଶରୀର । ବିମାନବନ୍ଦରରେ ବୈଜୟନ୍ତ ପଣ୍ଡାଙ୍କ ଏକ ଟିମ ମୁକୁନ୍ଦଙ୍କୁ ଶେଷ ଶ୍ରଦ୍ଧାଞ୍ଜଳି ଦେଇଛନ୍ତି ।
ସୂଚନା ଯୋଗ୍ୟ ଯେ, ଯାଜପୁର ଜିଲ୍ଲା ବରି ରାମଚନ୍ଦ୍ରପୁର ଥାନା ଅନ୍ତର୍ଗତ କମ୍ପଗଡ ଗ୍ରାମର ସ୍ବର୍ଗତ ବନମାଳି ଦାଶଙ୍କ ପୁଅ ମୁକୁନ୍ଦ ପ୍ରଶାଦ ଦାଶ ଗୋଟିଏ ବର୍ଷ ତଳେ ରୋଜଗାର ଅନ୍ବେଷଣରେ ସାଉଦି ଆରବ ଯାଇଥିଲେ । କିନ୍ତୁ ଦୁର୍ଭାଗ୍ୟବଶତଃ ଗତ ଜାନୁଆରୀ 31 ତାରିଖରେ ତାଙ୍କର ମୃତ୍ୟୁ ହୋଇଥିଲା । ଏନେଇ ମୁକୁନ୍ଦଙ୍କ ଜଣେ ବନ୍ଧୁ ତାଙ୍କ ପରିବାରକୁ ଜଣାଇଥିଲେ । ପରିବାର ଲୋକେ ମୁକୁନ୍ଦଙ୍କ କମ୍ପାନୀକୁ ଯୋଗାଯୋଗ କରିଥିଲେ କିନ୍ତୁ ସେମାନେ ନା ମୃତ୍ୟୁର କାରଣ ଜଣାଇଥିଲେ ନା କୌଣସି ସାହାଯ୍ୟ କରିଥିଲେ । ଅନ୍ୟ କୌଣସି ଉପାୟ ନପାଇ ମୁକୁନ୍ଦଙ୍କ ପରିବାର ବୈଜୟନ୍ତଙ୍କ ସାହାଯ୍ୟ ଲୋଡିଥିଲେ । ବୈଜୟନ୍ତ ପଣ୍ଡା ଭାରତୀୟ ରାଷ୍ଟ୍ରଦୂତଙ୍କୁ ଚିଠି ଲେଖି ମୁକୁନ୍ଦଙ୍କ ମୃତଦେହ ଫେରାଇ ଆଣିବା ବ୍ୟବସ୍ଥା କରିବାକୁ ନିବେଦନ କରିଥିଲେ ।
ତେବେ ପ୍ରାୟ ଗୋଟିଏ ମାସର ଚେଷ୍ଟା ପରେ ଶେଷରେ ଗତ ବୁଧବାର ରାତିରେ ଓଡ଼ିଶା ଫେରିଛି ମୁକୁନ୍ଦଙ୍କ ମୃତଦେହ । ମୃତଦେହ ହସ୍ତାନ୍ତର କରାଯିବା ପରେ ବୈଜନ୍ତଙ୍କୁ କୃତଜ୍ଞତା ଜଣାଇଛନ୍ତି ପରିବାର ଲୋକେ । ବୈଜୟନ୍ତ ସୁଖ ଦୁଃଖ ବନ୍ଧୁ ବୋଲି କହିଛି ମୁକୁନ୍ଦଙ୍କ ପରିବାର ।
