ଭୁବନେଶ୍ବର: ରାଜ୍ୟ ଯୋଜନା ବୋର୍ଡ ଉପାଧ୍ୟକ୍ଷ ସଂଜୟ କୁମାର ଦାସବର୍ମାଙ୍କ ଅଧ୍ୟକ୍ଷତାରେ ଏକ ଉଚ୍ଚସ୍ତରୀୟ ବୈଠକ ଆଜି ଲୋକସେବା ଭବନରେ ଅନୁଷ୍ଠିତ ହୋଇଛି । ବୈଠକରେ ପୁରୀ ଜିଲ୍ଲାରେ ଅର୍ଦ୍ଧନିର୍ମିତ ଭାର୍ଗବୀ ନଦୀ ଉପରେ ପ୍ରସ୍ତାବିତ ମାଳିସାହି ସେତୁ କାର୍ଯ୍ୟ ଆରମ୍ଭ ପାଇଁ ଯୋଜନା ବୋର୍ଡ ଉପାଧ୍ୟକ୍ଷ ଗୁରୁତ୍ୱ ଦେଇଛନ୍ତି । ୭ ଦିନ ମଧ୍ୟରେ ଓଡ଼ିଶା କନ୍ଷ୍ଟ୍ରକ୍ସନ୍ କର୍ପୋରେସନ୍ (OCC) ଦାୟିତ୍ଵରେ ସେତୁ ନିର୍ମାଣ କାର୍ଯ୍ୟ ଆରମ୍ଭ ପାଇଁ ବୈଠକରେ ମୁଖ୍ୟ ଶାସନ ସଚିବ ସୁରେଶ ଚନ୍ଦ୍ର ମହାପାତ୍ର ନିର୍ଦ୍ଦେଶ ଦେଇଛନ୍ତି ।
ସୁନାମୁଖୀ ନଦୀ ଉପରେ କଣ୍ଟ୍ରୋଲ ଷ୍ଟ୍ରକଚର ଓ ବ୍ରିଜ୍ ନିର୍ମାଣ ପାଇଁ ଅଞ୍ଚଳବାସୀଙ୍କ ତରଫରୁ ଦାବି କରାଯାଉଛି । ଏହି ଦାବିକୁ ବିଚାରକୁ ନେଇ ଏହାର କାର୍ଯ୍ୟ ଡ୍ରେନେଜ୍ ବିଭାଗ ତରଫରୁ ୭ କୋଟି ଟଙ୍କା ବିନିମୟରେ ଆରମ୍ଭ କରିବା ପାଇଁ ଆଜି ବୈଠକରେ ନିଷ୍ପତ୍ତି ନିଆଯାଇଛି । ଚିଲିକା ଓ ସମୁଦ୍ର ଦ୍ଵାରା କ୍ରମାଗତ ଜୁଆର ଓ ସାମୁଦ୍ରିକ ଝଡ଼ ଦ୍ଵାରା ଆଳୁପାଟଣାଠାରୁ ମୋଟ ପର୍ଯ୍ୟନ୍ତ ତଟବର୍ତ୍ତୀ ଅଞ୍ଚଳ ବାରମ୍ବାର ପ୍ରଭାବିତ ହେଉଥିବାରୁ ଦୀର୍ଘକାଳୀନ ଓ ସ୍ଥାୟୀ ଯୋଜନା ପ୍ରସ୍ତୁତ କରି ତୁରନ୍ତ ପଦକ୍ଷେପ ଉପରେ ଯୋଜନା ବୋର୍ଡ ଉପାଧ୍ୟକ୍ଷ ଗୁରୁତ୍ୱାରୋପ କରିଛନ୍ତି ।