ରାଜଧାନୀରେ ମହାମାରୀ ରୋକିବାକୁ ସଚେତନତା କାର୍ଯ୍ୟକ୍ରମ ଆୟୋଜିତ

ରାଜଧାନୀରେ ବଢୁଥିବା ସଂକ୍ରମଣକୁ ଦୃଷ୍ଟିରେ ରଖି ରାଜଧାନୀବାସୀଙ୍କୁ ସଚେତନ କରିବା ଜରୁରୀ ହୋଇ ପଡିଛି । ଏମିତିରେ ସଂକ୍ରମଣକୁ ରୋକିବା ପାଇଁ ଚେଷ୍ଟା ଆରମ୍ଭ କରିଛି ବିଏମସି ।

ଭୁବନେଶ୍ବର: ରାଜଧାନୀରେ ବଢୁଥିବା ସଂକ୍ରମଣକୁ ଦୃଷ୍ଟିରେ ରଖି ରାଜଧାନୀବାସୀଙ୍କୁ ସଚେତନ କରିବା ଜରୁରୀ ହୋଇ ପଡିଛି । ଏମିତିରେ ସଂକ୍ରମଣକୁ ରୋକିବା ପାଇଁ ଚେଷ୍ଟା ଆରମ୍ଭ କରିଛି ବିଏମସି । ଏନେଇ ଶନିବାର ବିଏମସି ପକ୍ଷରୁ ଭୁବରନେଶ୍ବର 29ନଂ ୱାର୍ଡରେ 5ଟି ବସ୍ତି କମିଟି, ନୀଳାଦ୍ରିସ୍ଥିତ ବସ୍ତି ଓ ଏହି ଅଞ୍ଚଳରେ କାର୍ଯ୍ୟ କରୁଥିବା ବିଭିନ୍ନ ଏନଜିଓ ସଂସ୍ଥା ଓ ପିଅର ଲିଡରଙ୍କୁ ସଚେତନ କରାଯାଇଛି ।

ସ୍ବତନ୍ତ୍ର ଭାବେ ବିଏମସି ଏକ ସଚେତନତା କାର୍ଯ୍ୟକ୍ରମର ଆୟୋଜନ କରି ସମ୍ପୃକ୍ତ ଅଞ୍ଚଳରେ ନାଗରିକଙ୍କୁ ସଚେତନ କରିବା ପାଇଁ ଚେଷ୍ଟା ଆରମ୍ଭ କରିଛି । ଏଥିରେ କୋରୋନା ପ୍ରତିରୋଧ କରିବା, ସୁସ୍ଥ ଓ ସୁରକ୍ଷିତ ରହିବା ଏବଂ ସର୍ବୋପରି କୋରୋନା ସଂକ୍ରମଣକୁ ମାତ ଦେବା ପାଇଁ ସବୁ ବର୍ଗର ସାହାଯ୍ୟ ଲୋଡିଛନ୍ତି ବିଏମସି କର୍ତ୍ତୃପକ୍ଷ । ଜନ ସଚେତନତା ଏବଂ ଆତ୍ମନିର୍ଭରଶୀଳତାକୁ ଆପଣେଇ କୋରୋନାକୁ ହରାଇ ରାଜଧାନୀରେ କିଭଳି କୋରୋନା ସଂକ୍ରମଣକୁ ରୋକାଯାଇ ପାରିବ ସେନେଇ ବିଏମସି ଉଦ୍ୟମ ଜାରି ରଖିଛି ।

ଏଥିପାଇଁ ନୂଆ ଅଭ୍ୟାସକୁ ଆପଣାଇବା ସହ ସବୁବେଳେ 2 ମିଟରର ସାମାଜିକ ଦୂରତା ରକ୍ଷା କରିବା, ହାତ ଧୋଇବା, ବାହାରକୁ ବାହାରିଲେ ମାସ୍କ ବ୍ୟବହାର କରିବା, ମୁଁହ ଘୋଡେଇବା ଆଦିକୁ କଡାକଡି ଭାବେ ମାନିବା ପାଇଁ ବିଏମସି ପରାମର୍ଶ ଦେଇଛି । ତେବେ ଏଭଳି ସଚେତନତା କାର୍ଯ୍ୟକ୍ରମ ପ୍ରତି ୱାର୍ଡରେ ଚାଲୁ ରହିଥିବା ଜଣା ପଡିଛି । ଏନେଇ ସୂଚନା ଦେଇଛନ୍ତି ବିଏମସି କମିଶନର ପ୍ରେମ ଚନ୍ଦ୍ର ଚୌଧୁରୀ ।

ଭୁବନେଶ୍ବରରୁ ସଞ୍ଜୀବ ରାୟ, ଇଟିଭି ଭାରତ