ଭୁବନେଶ୍ବର : ବିଧାନସଭାରେ ଯାତ୍ରା କଳାକାରଙ୍କ ପ୍ରସଙ୍ଗ ଉଠାଇଲେ କଂଗ୍ରେସ ବିଧାୟକ । ଯାତ୍ରା କଳାକାର ସରକାରଙ୍କ ଅବେହଳାର ଶିକାର ହୋଇଛନ୍ତି ବୋଲି ବିଧାୟକ ତାରା ପ୍ରସାଦ ବାହିନୀପତି କହିଛନ୍ତି । କାମଧନ୍ଦା ନ ପାଇ କଳାକାର ରାସ୍ତାରେ କାନ୍ଦୁଛି । ଅନେକ ବାଲାଂଦେଶକୁ ଚାଲିଗଲେଣି । ଏନେଇ ରାଜ୍ୟ ସରକାର କେନ୍ଦ୍ରକୁ ଚିଠି ଲେଖିବାକୁ କହିଛନ୍ତି ବାହିନୀପତି ।
ଏହାସହ ସେ ଯାତ୍ରା କଳାକାରଙ୍କୁ ଶାସ୍ତ୍ରୀୟ ମାନ୍ୟତା ଦାବି ଦେବାକୁ ଦାବି କରିଥିଲେ । 2000 ଲୋକଙ୍କ ଉପସ୍ଥିତିରେ ପୁଣି ଥରେ ଯାତ୍ରା କରିବାକୁ ଅନୁମିତ ଦେବାକୁ ବାଚସ୍ପତିଙ୍କ ଜରିଆରେ ସରକାରଙ୍କୁ ଜଣାଇଥିଲେ ବାହିନୀପତି । ସେପଟେ ଏହାକୁ ବାଚସ୍ପତି ସମାଧାନ କରିବାକୁ ରୁଲିଂ ଦେଇଥିଲେ ।
ଦୀର୍ଘ 11 ମାସରୁ ଅଧିକ ସମୟ ଧରି ଯାତ୍ରା ବା ଅପେରା ବନ୍ଦ ରହିଛି । କୋଭିଡ ସଂକ୍ରମଣକୁ ନଜରରେ ରଖି ସରକାର ଯାତ୍ରା କରିବାକୁ ଅନୁମତି ଦେଇନାହାଁନ୍ତି । ଫଳରେ ଯାତ୍ରା କଳାକାରଙ୍କ ଜୀବନ ଦୁର୍ବିଶଃ ହୋଇପଡିଛି । କାମଧନ୍ଦା ନ ଥିବାରୁ ଜୀବନଯାପନ କରିବା କାଠକର ପାଠ ହୋଇପଡିଛି । ସେପଟେ, ସରକାରଙ୍କ ପକ୍ଷରୁ ଏମାନଙ୍କ ପାଇଁ ଆଜି ପର୍ଯ୍ୟନ୍ତ କୌଣସି ସ୍ବତନ୍ତ୍ର ସହାୟତ ମଧ୍ୟ ମିଳିପାରି ନାହିଁ । ଅନ୍ୟପଟେ, କୋଭିଡର ଦ୍ବିତୀୟ ଲହରି ଆରମ୍ଭ ହୋଇଯାଇଥିବାରୁ ଏଭଳି ଆଉ କେତେ ଦିନ ଯାତ୍ରା ବନ୍ଦ ରହିବ ତାହା ମଧ୍ୟ ଅନିଶ୍ଚିତତା ଦେଖାଦେଇଛି ।
ସୂଚନାଯୋଗ୍ୟ, ସୋମବାର ଯାତ୍ରା ପରିବେଷଣ ଅନୁମତି ପାଇଁ ଆମରଣ ଅନଶନ ଦେଇଥିଲେ ଯାତ୍ରା କଳାକାର । ୨ ଦଫା ଦାବିରେ ଭୁବନେଶ୍ୱର ଲୋୟର ପିଏମଜିରେ ଆମରଣ ଅନଶନ ଓ ଗଣଧାରଣା ଦେଇଥିଲେ।
ଭୁବନେଶ୍ବରରୁ ତପନ ଦାସ, ଇଟିଭି ଭାରତ
