ଭୁବନେଶ୍ବର:ରାଜ୍ୟ କଂଗ୍ରେସକୁ ଲାଗିପାରେ ପୁଣି ଏକ ବଡ ଝଟ୍କା । କାର୍ଯ୍ୟକାରୀ ସଭାପତି ତଥା ଉପକୂଳ ଓଡିଶାର ଟାଣୁଆ ନେତା ଚିରଞ୍ଜୀବୀ ବିଶ୍ବାଳ ଦଳ ଛାଡିବା ଚର୍ଚ୍ଚା ଜୋର ଧରିଛି । ନିଜେ ପୂର୍ବତନ ଜଗତସିଂହପୁର ବିଧାୟକ ଏନେଇ କୌଣସି ପ୍ରତିକ୍ରିୟା ରଖିନଥିଲେ ମଧ୍ୟ ତାଙ୍କର ନିକଟତମ ମହଲରୁ ଏହି ଖବର ମିଳିଥିବା କୁହାଯାଉଛି । ତେବେ ରାଜ୍ୟରେ କଂଗ୍ରେସ ନେତା ଦଳ ଛାଡିବା କୌଣସି ନୂଆକଥା ନୁହେଁ ।
ଡଜନେରୁ ଅଧିକ କଂଗ୍ରେସ ନେତା ହାତ ଛାଡି ସବୁଜ କ୍ୟାମ୍ପ୍ରେ ସାମିଲ ହେବାପରେ ସୁପ୍ରିମୋଙ୍କ ଠାରୁ ଗୁରୁତ୍ବପୂର୍ଣ୍ଣ ପଦ ଆକାରରେ ପୁରସ୍କାର ମଧ୍ୟ ମିଳିଛି । ମାତ୍ର ଚିରଞ୍ଜୀବୀଙ୍କ କଥା ଅଲଗା । ସେ ହେଉଛନ୍ତି ଓଡିଶାର ପୂର୍ବତନ ଉପମୁଖ୍ୟମନ୍ତ୍ରୀ ବସନ୍ତ ବିଶ୍ବାଳଙ୍କ ପୁତ୍ର । ଏପରିକି ରାଜ୍ୟ କଂଗ୍ରେସର ଜଣେ ଆଗ ଧାଡିର ନେତା । ପୂର୍ବରୁ କାର୍ଯ୍ୟକାରୀ ସଭାପତି ରହିଥିବା ପ୍ରଦୀପ ମାଝି ମଧ୍ୟ ହାତକୁ ବାଏ ବାଏ କରି ଶଙ୍ଖ ଶିବିରରେ ଶରଣ ନେଇଥିଲେ । ତେବେ ଚିରଞ୍ଜୀବୀ ଦଳ ଛାଡିବା ଖବର ଉପରେ ପ୍ରତିକ୍ରିୟା ରଖିଛନ୍ତି ବିଧାୟକ ସୁର ରାଉତରାୟ ।