ଭୁବନେଶ୍ବର:ରାଜଧାନୀର କୁଆଖାଇ ନଦୀପଠାରୁ ରହସ୍ୟମୟ ଯୁବକଙ୍କ ମୃତଦେହ ଉଦ୍ଧାର ଘଟଣାର ଖିଅ ଖୋଜା ଚଳାଇଛି କମିଶନରେଟ ପୋଲିସ । ୫ଫୁଟ୍ ୮ଇଞ୍ଚର ହୃଷ୍ଟପୁଷ୍ଠ ଯୁବକ, ଓଜନ ୪୬ କିଲୋଗ୍ରାମ ହୋଇଥିବାବେଳେ ଦେହରେ କୌଣସି କ୍ଷତ ଚିହ୍ନ ନାହିଁ । ବୟସ ପ୍ରାୟ ୧୮ରୁ ୨୫ବର୍ଷ ହେବା ନେଇ ପୋଲିସ ଅନୁମାନ କରିଛି । ଏଭଳି ଏକ ରହସ୍ୟମୟ ଯୁବକଙ୍କ ଗଳିତ ମୃତଦେହର ମାସେ ହେଲା ପରିଚୟ ଖୋଜୁଛି କମିଶନରେଟ୍ ପୋଲିସ ।
ମୃତଦେହର ମୁଣ୍ଡ ଅଛି ଅଥଚ ପରିଚୟ ଖୋଜିବାକୁ ସୁପରକପ ଅଫିସରଙ୍କ ମୁଣ୍ଡ ପାଉନି । ମୃତଦେହ ସହ ସାର୍ଟ, ପ୍ୟାଣ୍ଟ ଓ ଚପଲ ସହ ପିନ୍ଧିଥିବା କାନର କୁଣ୍ଡଳ ସହ ଅନେକ ସୁରାକ ଅଛି । ଅଥଚ ନା ଯୁବକଙ୍କ ପରିଚୟ ମିଳୁପାରୁଛି ନା ଠିକଣା । ଯୁବକଙ୍କ ପରିଚୟ ଓ ଠିକଣା ପାଇ ପାରୁନାହାଁନ୍ତି କମିଶନରେଟ ପୋଲିସ ସ୍ବତନ୍ତ୍ର ଅନଆଇଡେଣ୍ଟିଫାଏଡ ମ୍ୟାନ ମିସିଂ ସେଲ୍ । ଏହି ମାମଲାରେ ସମୟ ଗଡ଼ିବା ସହ ତଦନ୍ତ ମଧ୍ୟ ଦିଗହରା ହେବାରେ ଲାଗିଛି । ହେଲେ ବାକି ଥିବା ମାମଲା ଓ ସମାଧାନ ହୋଇନଥିବା ହତ୍ୟାକାଣ୍ଡ ମାମଲାକୁ ପୁନଃ ରିଓପନ କରି ଖୋଳତାଡ କରୁଥିବା ଅଧିକାରୀ ଏବେ ଦିଗହରା ହୋଇଛନ୍ତି । ପରିଚୟ ଖୋଜିବା ପାଇଁ ଏବେ କାହାଣୀର ଏକ ମୋଡ଼ ଦେବାକୁ ପ୍ରୟାସ ଚାଲିଛି । ଅର୍ଥାତ କେହି ମୃତଦେହକୁ ଆଣି ଫିଙ୍ଗିଦେଇଥିବା କିମ୍ବା ପରିବାର ଲୋକ ମୃତଦେହକୁ ଏଭଳି ଫିଙ୍ଗିବା ପରେ ପୋଲିସ ଭୟରେ ସାମ୍ନାକୁ ଆସୁନଥିବା ପୋଲିସ ସନ୍ଦେହ କରିଛି ।
କୌଣସି ସିକ୍ୟୁରିଟି ଏଜେନ୍ସି ବା ସୁରକ୍ଷା ବାହିନୀର ଯବାନ କି କର୍ମଚାରୀଙ୍କ ମୃତ୍ୟୁକୁ ଲୁଚାଇବାକୁ ଏଭଳି ପ୍ରୟାସ କରାଯାଉଥିବା ମଧ୍ୟ ସନ୍ଦେହ କରାଯାଉଛି । ଅଥବା ରାଜ୍ୟ ଵାହାରର କେହି ପ୍ରମାଣ ନଷ୍ଟ କରିବାକୁ ଏଭଳି ପ୍ରୟାସ କରାଯାଇନାହିଁ ତ ? ଏଭଳି ଅନେକ ସମ୍ଭାବନା ନେଇ ଥିଓରି ଓ କାହାଣୀ ତିଆରି କରି ଏଦିଗରେ ତଦନ୍ତ କରି ମାମଲାର ସମାଧାନ କରିବାକୁ ପ୍ରୟାସ କରୁଛି କମିଶନରେଟ ପୋଲିସ । ହେଲେ ଏହାରି ଭିତରେ ମାସେ ଵିତିଲାଣି । କଟାମୁଣ୍ଡ ଘଟଣାରେ ମୁଣ୍ଡ ଖୋଜି ମାଇଲେଜ ନେଇଥିବା ପୋଲିସ ଅଧିକାରୀଙ୍କୁ ପଦକ ବିବେଚିତ ହେଵା ପରେ ଉତ୍ସାହିତ ହୋଇ ପଡ଼ିଛନ୍ତି । ପୋଲିସ ଅଫିସର ଏଠି କିନ୍ତୁ ନିଜର ପାରିବା ପଣିଆ ଦେଖାଇବାରେ ଫେଲ ମାରିଛନ୍ତି । କାରଣ ଫରେନ୍ସିକ ଉପଦେଶ ସହ ତଦନ୍ତରେ ନୂଆ କୌଶଳର ବ୍ଯବହାର ପରେ ବି ନଦୀ ପଠାରୁ ଉଦ୍ଧାର ଯୁବକଙ୍କ ମୃତଦେହ ବିଷୟରେ ସୁରାକ ପାଉନି ପୋଲିସ ।