ଭୁବନେଶ୍ବର: ତାଳଚେର ତାପଜ ବିଦ୍ୟୁତ କେନ୍ଦ୍ର(ଟିଟିପିଏସ) ସଂମ୍ପ୍ରସାରଣ ପ୍ରସଙ୍ଗ । ଟିଟିପିଏସ ସମ୍ପ୍ରସାରଣ ପାଇଁ କେନ୍ଦ୍ରମନ୍ତ୍ରୀଙ୍କୁ ଚିଠି ଲେଖିଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । କେନ୍ଦ୍ର ଶକ୍ତି ରାଷ୍ଟ୍ରମନ୍ତ୍ରୀ ଆର.କେ ସିଂହଙ୍କୁ ଏହ ବାବଦରେ ଚିଠି ଲେଖିଛନ୍ତି ନବୀନ ।
ଟିଟିପିଏସ ଷ୍ଟେଜ ଥ୍ରୀ ପ୍ରକଳ୍ପ ସଂମ୍ପ୍ରସାରଣ ପାଇଁ ନବୀନ ଚିଠିରେ ଉଲ୍ଳେଖ କରିଛନ୍ତି । ମୁଖ୍ୟମନ୍ତ୍ରୀ ଲେଖିଛନ୍ତି ଯେ, ତାଳଚେର ଥର୍ମାଲ୍ ପାଓ୍ଵାର୍ ଷ୍ଟେସନ୍ର ଷ୍ଟେଜ୍-୩ ସଂମ୍ପ୍ରସାରଣ ପ୍ରକଳ୍ପକୁ ରାଜ୍ୟ ସରକାର ୨୦୨୦ ଫେବୃଆରିରେ ଅନୁମୋଦନ କରିଛନ୍ତି। ହେଲେ ଏନ୍ଟିପିସି ଏପର୍ଯ୍ୟନ୍ତ ତାହା କାର୍ଯ୍ୟକାରୀ କରିନାହିଁ । ଏହାଛଡ଼ା ୨୦୨୧ ମାର୍ଚ୍ଚ ୩୧ରୁ ତାଳଚେର ତାପଜ ବିଦ୍ୟୁତ୍ କେନ୍ଦ୍ରକୁ କେନ୍ଦ୍ର ସରକାର ବନ୍ଦ କରିବାକୁ ନିଷ୍ପତ୍ତି ନେଇଛନ୍ତି ।
ଫଳରେ ହଜାର ହଜାର ପରିବାର ଏବଂ ସ୍ଥାନୀୟ ଅର୍ଥନୀତି ପ୍ରତ୍ୟକ୍ଷ ଏବଂ ପରୋକ୍ଷ ପ୍ରଭାବିତ ହେବ । ତାଳଚେର ତାପଜ ବିଦ୍ୟୁତ୍ କେନ୍ଦ୍ର ହେଉଛି ଦେଶର ଅନ୍ୟତମ ସର୍ବପୁରାତନ ତାପଜ ବିଦ୍ୟୁତ୍ କେନ୍ଦ୍ର । ଓଡ଼ିଶା ସରକାରଙ୍କ ଦ୍ୱାରା ସ୍ଥାପିତ ଏହି ତାପଜ ବିଦ୍ୟୁତ୍ କେନ୍ଦ୍ରର ଷ୍ଟେଜ୍-୧ (୨୪୦ ଏମ୍ଡବ୍ଲୁ) ୧୯୬୮ରେ ଏବଂ ୧୯୮୨ରେ ଷ୍ଟେଜ୍-୨ (୨୨୦ଏମ୍ଡବ୍ଲୁ) ଚାଲୁ ହୋଇଥିଲା ।