ଭୁବନେଶ୍ବର: ରାଜନୈତିକ ଉଷ୍ମତା ବଢାଉଛି କଳାହାଣ୍ଡି ଜିଲ୍ଲା ସନସାଇନ ସ୍କୁଲ୍ ଶିକ୍ଷୟିତ୍ରୀ ମମିତା ମେହେର ହତ୍ୟା ମାମଲା । ପ୍ରତିଦିନ ମମିତାଙ୍କୁ ନ୍ୟାୟ ଦାବିରେ ରାଜ୍ୟର ବିଭିନ୍ନ ସ୍ଥାନରେ ବିକ୍ଷୋଭ ପ୍ରଦର୍ଶନ କରାଯାଉଛି । ମାମଲାରେ ମନ୍ତ୍ରୀ ଦିବ୍ୟଶଙ୍କର ମିଶ୍ରଙ୍କ ସମ୍ପୃକ୍ତି ଥିବା ଦର୍ଶାଇ ପ୍ରତିଦିନ ଶାସକ ଦଳକୁ ଘେରୁଛନ୍ତି ବିରୋଧୀ ।
ଦିବ୍ୟଶଙ୍କରଙ୍କ ସହ ମୁଖ୍ୟମନ୍ତ୍ରୀଙ୍କ ଷ୍ଟେଜ୍ ସେୟାରକୁ ବିରୋଧ, କୁଶପୁତ୍ତଳିକା ଦାହ
ଏପରିକ୍ଷେତ୍ରରେ ମୁଖ୍ୟମନ୍ତ୍ରୀ, ଦିବ୍ୟଶଙ୍କରଙ୍କ ସହ ଷ୍ଟେଜ୍ ସେୟାର କରିବାକୁ ନେଇ ତାତିଛନ୍ତି ବିରୋଧୀ । ଜଣେ ଅଭିଯୁକ୍ତ ମନ୍ତ୍ରୀଙ୍କ ସହ ମୁଖ୍ୟମନ୍ତ୍ରୀ ଷ୍ଟେଜ୍ ସେୟାର କରିବା ଲଜ୍ଜାଜନକ ବୋଲି ଅଖିଳ ଭାରତୀୟ ବିଦ୍ୟାର୍ଥୀ ପରିଷଦ କଟାକ୍ଷ କରିଛି । ଏହାକୁ ପରିଷଦ ତୀବ୍ର ବିରୋଧ କରିବା ସହ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଜଣେ ହତ୍ୟାକାରୀଙ୍କୁ ଖୋଲା ସମର୍ଥନ କରୁଥିବା ଅଭିଯୋଗ କରି ମୁଖ୍ୟମନ୍ତ୍ରୀଙ୍କ କୁଶପୁତ୍ତଳିକା ଦାହ କରିଛି । ଏହାକୁ ନେଇ ଏବିଭିପି ଆଗାମୀ ଦିନରେ ନବୀନ ନିବାସ ଘେରିବ ବୋଲି ଚେତାବନୀ ଦେଇଛି ।