ଚିଟଫଣ୍ଡ ଦୁର୍ନୀତି ତଦନ୍ତ ପ୍ରକ୍ରିୟାରେ ପରିବର୍ତ୍ତନ, ଆଶଙ୍କାରେ ଜମାକାରୀ

ଚିଟଫଣ୍ଡ ଦୁର୍ନୀତି ମାମଲାରେ ତଦନ୍ତ ପାଇଁ ଟର୍ମସ ଅଫ୍ ରେଫରେନ୍ସରେ ସଂଶୋଧନ କରାଯାଇଛି । ଏଥିରେ ଜମାକାରୀ ବଦଳରେ କ୍ଷୁଦ୍ର ଜମାକାରୀ ରହିଥିବାରୁ କ୍ଷତିଗ୍ରସ୍ତମାନେ ନିଜ ଟଙ୍କା ଫେରିପାଇବା ନେଇ ଆଶଙ୍କା ପ୍ରକାଶ କରିଛନ୍ତି ।

ଭୁବନେଶ୍ବର/ବାଲେଶ୍ବର: ଚିଟଫଣ୍ଡ ଦୁର୍ନୀତି ମାମଲାରେ ତଦନ୍ତ ବେଶ ଧୀମା ପରିଲକ୍ଷିତ ହୋଇଛି । ଯାହାକୁ ନେଇ ଚିନ୍ତାରେ ପଡିଛନ୍ତି ଜମାକାରୀ । ତେବେ ନିକଟରେ ତଦନ୍ତ କମିଶନଙ୍କ ପାଇଁ ଉଦ୍ଦିଷ୍ଟ ଟର୍ମସ ଅଫ୍ ରେଫରେନ୍ସରେ ସଂଶୋଧନ ହୋଇଥିବା ନେଇ ରାଜ୍ୟ ଗୃହ ବିଭାଗ ପକ୍ଷରୁ ବିଜ୍ଞପ୍ତି ପ୍ରକାଶ ପାଇଛି । ଏହି ରିପୋର୍ଟରେ ଜମାକାରୀ ବଦଳରେ କ୍ଷୁଦ୍ର ଜମାକାରୀ ରହିଥିବାରୁ କ୍ଷତିଗ୍ରସ୍ତମାନେ ଆଶଙ୍କା ପ୍ରକାଶ କରିଛନ୍ତି ।

ସଂଶୋଧିତ ଟର୍ମସ ଅଫ ରେଫରେନ୍ସ ଅନୁସାରେ, କମିଶନ କେବଳ କ୍ଷୁଦ୍ର ଜମାକାରୀଙ୍କ ପ୍ରସଙ୍ଗରେ ତଦନ୍ତ କରିବେ । ପୂର୍ବରୁ ପ୍ରକୃତ ଜମାକାରୀଙ୍କୁ ଚିହ୍ନଟ କରାଯିବ ବୋଲି ଟର୍ମସ ଅଫ ରେଫରେନ୍ସରେ ଉଲ୍ଲେଖ ରହିଥିଲା । ହେଲେ ଏବେ ସଂଶୋଧିତ ବିଜ୍ଞପ୍ତିରେ ଜମାକାରୀ ବଦଳରେ କ୍ଷୁଦ୍ର ଜମାକାରୀ ବୋଲି ଉଲ୍ଲେଖ ରହିଛି । ଯାହାକୁ ନେଇ ପ୍ରକୃତ ଜମାକାରୀଙ୍କ ଚିନ୍ତା ବଢି ଯାଇଛି । ସେମାନେ ଟଙ୍କା ଫେରିପାଇବା ନେଇ ଆଶଙ୍କା ସୃଷ୍ଟି ହୋଇଛି । ଚିଟ୍‌ଫଣ୍ଡ ମାମଲାରେ ଜଷ୍ଟିସ ମଦନ ମୋହନ ଦାସଙ୍କ ନେତୃତ୍ବରେ ଏବେ ତଦନ୍ତ କରାଯାଉଛି ।

ସରକାରଙ୍କ ଏଭଳି ଆଭିମୁଖ୍ୟ ନେଇ ବର୍ଷିଛି କ୍ଷତିଗ୍ରସ୍ତ ମିଳିତ ମଞ୍ଚର ଆବାହକ ଜୟନ୍ତ ଦାସ । କ୍ଷତିଗ୍ରସ୍ତ ମାନଙ୍କୁ ନେଇ ସରକାରଙ୍କ ଆନ୍ତରିକତା ନ ଥିବା ସେ ପ୍ରକାଶ କରିଛନ୍ତି । ତେବେ ଆସନ୍ତା ଜାନୁୟାରୀ ମାସରୁ ମଞ୍ଚ ପକ୍ଷରୁ ସବୁ ତହସିଲରେ ପ୍ରତିବାଦ କରାଯିବ ବୋଲି ଚେତାବନୀ ଦିଆଯାଇଛି । ସେହିପରି ଜମାକାରୀଙ୍କ ପାଇଁ ସରକାର ଆଦୌ ଚିନ୍ତିତ ନୁହଁନ୍ତି ବୋଲି ବିଜେପି କହିଛି । ଏହା ଏକ ଭେଳିକି । କେବଳ ଭୋଟ ହାତେଇବା ପାଇଁ କର୍ପସ ପାଣ୍ଠି ଗଠନ ହୋଇଥିଲା ବୋଲି ବିଜେପି ଅଭିଯୋଗ କରିଛି । ଅନ୍ୟପଟରେ ସରକାର ଏନେଇ ଅଧିକ ନିରୀକ୍ଷଣ କରୁଥିବା ଅର୍ଥ ସଚିବ ଅଶୋକ ମୀନା କହିଛନ୍ତି । ପ୍ରକୃତ କ୍ଷତିଗ୍ରସ୍ତଙ୍କୁ ଚିହ୍ନଟ କରାଯିବା ପରେ ସେମାନଙ୍କୁ ଟଙ୍କା ଦିଆଯିବ ବୋଲି ସେ ପ୍ରକାଶ କରିଛନ୍ତି ।

ଭୁବନେଶ୍ବରରୁ ଜ୍ଞାନଦର୍ଶୀ ସାହୁ ଓ ବାଲେଶ୍ଵରରୁ ଜୀବନଜ୍ୟୋତି ନାୟକ, ଇଟିଭି ଭାରତ