ଭୁବନେଶ୍ବର: ଭାରତର ମହଲେଖା ନିୟନ୍ତ୍ରକ ତଥା ମହାସମୀକ୍ଷକଙ୍କ ରିପୋର୍ଟ ବିଧାନସଭାରେ ଉପସ୍ଥାପନ ପରେ ଏକ ସାମ୍ବାଦିକ ସମ୍ମିଳନୀ ଆୟୋଜନ ହୋଇଛି । ମହାଲେଖାକାର କାର୍ଯ୍ୟାଳୟରେ ଆୟୋଜିତ ସାମ୍ବାଦିକ ସମ୍ମିଳନୀରେ ପ୍ରଧାନ ମହାଲେଖାକାର ଅନନ୍ତ କିଶୋର ବେହେରା ଓ ପ୍ରଧାନ ମହାଲେଖାକାର ବିଭୂଦତ ବସନ୍ତିଆ ରାଜ୍ୟବାସୀଙ୍କ ନିକଟରେ ତଥ୍ୟ ଉପସ୍ଥାପନ କରିଛନ୍ତି । ମାର୍ଚ୍ଚ ୨୦୨୧ ସମାପ୍ତ ଆର୍ଥିକ ବର୍ଷ ପାଇଁ ରାଜ୍ୟର ଆର୍ଥିକ ସ୍ଥିତି ଓ ଭୂପୃଷ୍ଠ ଜଳସେଚନ ସମ୍ପାଦନ ସମୀକ୍ଷାର ସିଏଜି ରିପୋର୍ଟର ତଥ୍ୟ ଉପସ୍ଥାପନ କରିଛନ୍ତି ।
ପ୍ରଧାନ ମହାଲେଖାକାର ବିଭୂଦତ ବସନ୍ତିଆ କହିଛନ୍ତି ୨୦୨୦-୨୦୨୧ରେ ସରକାରଙ୍କ ରାଜସ୍ବପ୍ରାପ୍ତି ସମୁଦାୟ ଘରୋଇ ଉତ୍ପାଦର ୨୦. ୪୯ ପ୍ରତିଶତ । ରାଜ୍ୟର ରାଜସ୍ବ ବ୍ୟୟ ଜିଏସଡିପିର ୧୮ ପ୍ରତିଶତ ରହିଥିଲା । ଯାହାକି ୨୦୧୯ -୨୦ ତୁଳନାରେ ୩.୮୬ ପ୍ରତିଶତ ହ୍ରାସ ପାଇଛି । ଏହି ସମୟରେ ନିଜସ୍ବ ଟିକସ ରହିଥିଲା ୩୪ ହଜାର ୨୫୮ କୋଟି ଟଙ୍କା । ଯାହାକି ପୂର୍ବବର୍ଷ ତୁଳନାରେ ୬.୦୧ ପ୍ରତିଶତ ବୃଦ୍ଧି ପାଇଥିଲା । ସେହିପରି ଅଣଟିକସ ରାଜସ୍ବ ପୂର୍ବବର୍ଷ ତୁଳନାରେ ୩୩.୨୬ ପ୍ରତିଶତ ବୃଦ୍ଧି ପାଇଛି । ୨୦୨୧ ସୁଦ୍ଧା ରାଜ୍ୟ ସରକାରଙ୍କ ପାଖରେ ୩୨ ହଜାର ୬୩୬ କୋଟି ଟଙ୍କା ନଗଦ ଅର୍ଥରାଶି ଜମାଥିଲା । ବିତିୟ ନିଅଣ୍ଟ ରାଜ୍ୟ ହୋଇ ମଧ୍ୟ ନିୟମିତ ଭାବେ ରାଜ୍ୟ ସରକାର ବହୁଳ ପରିମାଣରେ ନଗଦ ଅର୍ଥ ରଖି ଆସୁଛନ୍ତି ।
୧୧ ଟି ଅନୁଦାନରେ ଶତ ପ୍ରତିଶତ ସମର୍ପଣ କରାଯାଇଥିଲା । ୨୦୨୧ ମାର୍ଚ୍ଚ ୩୧ ସୁଦ୍ଧା ୮୧୧ ଟି ଟିଡିପି ଖାତାରେ ୭ ହଜାର ୪୭ କୋଟି ଟଙ୍କା ବ୍ୟୟ ନହୋଇ ଅବଶେଷ ରହିଥିଲା । ପୂର୍ବ ବର୍ଷ ତୁଳନାରେ ପିଡି ଆକାଉଣ୍ଟ ଗୁଡିକର ଅନାବଶ୍ୟକ ବାଲାନ୍ସରେ ୬୬.୨୮ ପ୍ରତିଶତ ହ୍ରାସ ଘଟିଛି । ମୁଖ୍ୟତଃ ଓଡିଶା ମିନେରାଲ ବିଅରିଙ୍ଗ ଡେଭଲପମେଣ୍ଟ କର୍ପୋରେସନ ( ଓଏମବିଏଡିସି ) ପୃଥକ ବିନିଯୋଗ ଆକାଉଣ୍ଟ ଖୋଲିବା ଏବଂ ୧୬ ହଜାର ୭୫୮ କୋଟି ଟଙ୍କା ବିନିଯୋଗ କରିବା ଏବଂ ଓଏମ୍ବିଏଡିସିର ପିଡି ଆକାଉଣ୍ଟରେ ୪୧୪.୮୫ କୋଟି ଟଙ୍କା ଛାଡିବା ରହିଛି । ଓଡିଶାରେ ପ୍ରାୟ ୬୧.୮୦ ଲକ୍ଷ ହେକ୍ଟର ଚାଷ ଜମି ଅଛି । ତନ୍ମଧ୍ୟରୁ ୪୯.୯୦ ଲକ୍ଷ ହେକ୍ଟର ଜମିକୁ ଜଳସେଚନ କରାଯାଇପାରିବ । ଭୂ-ପୃଷ୍ଠ ଜଳସେଚନ ପାଇଁ ଉପଲବ୍ଧ ଜଳର ପରିମାଣ ବାର୍ଷିକ ୯୫.୫୪ ଶହ କୋଟି ଆକଳନ ।
ମେଗା ଜଳସେଚନ ପ୍ରକଳ୍ପର ବିଳମ୍ବତାକୁ ନେଇ CAG ପ୍ରଶ୍ନ ଉଠାଇଛନ୍ତି । ପ୍ରକଳ୍ପ କର୍ତ୍ତୃପକ୍ଷଙ୍କର ଖର୍ଚ୍ଚ କରିବାର କ୍ଷମତା ୭୪ ପ୍ରତିଶତରୁ ୯୯ ପ୍ରତିଶତ ଥିଲା । ତଥାପି ତୁରନ୍ତ ଉପଯୋଗ ନ ହୋଇ ୨୦୧୪-୨୦୨୦ ମଧ୍ୟରେ ୮୪୨.୯୮ କୋଟି ଟଙ୍କା ସମର୍ପଣ ହୋଇଥିଲା । କାର୍ଯ୍ୟନିର୍ବାହ କରିବା ପାଇଁ ବିଭାଗ ଦ୍ବାରା ସୁସ୍ପଷ୍ଟ ଜାଗା ହସ୍ତାନ୍ତରରେ ବିଳମ୍ବ ଅନିବାର୍ଯ୍ୟ ମଞ୍ଜୁରୀ ପ୍ରାପ୍ତି ପ୍ରଭୃତିରେ ବିଳମ୍ବ ଏବଂ ପର୍ଯ୍ୟାଲୋଚନା କ୍ଷେତ୍ରରେ ଅବହେଳା ଆଦି କାରଣ ପାଇଁ ମୁଖ୍ୟତଃ ପାଣ୍ଠି ସମର୍ପଣ ହୋଇଥିଲା । ବୃହତ ଜଳସେଚନ ପ୍ରକଳ୍ପଗୁଡିକର ମୂଲ୍ୟ ୧୮୨ ରୁ ୪୫୯୬ ପ୍ରତିଶତ ପର୍ଯ୍ୟନ୍ତ ବୃଦ୍ଧି ହୋଇଥିଲା । ଏହି ବୃଦ୍ଧି ସତ୍ତ୍ଵେ ମାତ୍ର ଗୋଟିଏ ବୃହତ କଳସେଚନ ପ୍ରକଳ୍ପ ଅର୍ଥାତ୍ ୟୁଆଇଆଇପି ( ସଂପ୍ରସାରଣ ) ସମ୍ପୂର୍ଣ୍ଣ ହୋଇଥିଲା । ଏବଂ ଅନ୍ୟ ଚାରୋଟି ବୃହତ ଜଳସେଚନ ପ୍ରକଳ୍ପ ଗୁଡିକର ପ୍ରଗତି ବିଭିନ୍ନ ସ୍ତରରେ ଥିଲା ଯଦ୍ବାରା ପୁନର୍ବାର ମୂଲ୍ୟବୃଦ୍ଧିକୁ ଅଗ୍ରାହ୍ୟ କରିହେବ ନାହିଁ ।