ରାଜଧାନୀରେ କମିଶନରେଟ୍ ପୋଲିସର ଚଢାଉ, 5 ଗିରଫ

5 ନିଶା ବେପାରୀଙ୍କୁ ଗିରଫ କରିଛି କମିଶନରେଟ୍ ପୋଲିସସ । ଗିରଫ ବେପାରୀଙ୍କ ନାଁରେ 30ଟି ମାମଲା ରୁଜୁ କରାଯିବା ସହ କୋର୍ଟ ଚାଲାଣ କରାଯାଉଛି ।

ଭୁବନେଶ୍ବର: ରାଜଧାନୀରେ ଥମିବାର ନାଁ ନେଉନାହିଁ ଚୋରା ବ୍ରାଉନସୁଗାର ବେପାର । ଯାହାକ କମିଶନରେଟ୍ ପୋଲିସ ପାଇଁ ଚିନ୍ତାର ବିଷୟ ପାଲଟିଛି । ନିଶା ବେପାରୀଙ୍କୁ ସାବାଡ କରିବାକୁ କମିଶନରେଟ ପୋଲିସ ପକ୍ଷରୁ ସ୍ବତନ୍ତ୍ର ଭାବରେ ଚଢାଉ କରାଯାଇଛି । ଚଢାଉ ବେଳେ 5 ଜଣ ନିଶା ବେପାରୀଙ୍କୁ ଗିରଫ କରିଛି କମିଶନରେଟ୍ ପୋଲିସ ।

ଗିରଫ ଅଭିଯୁକ୍ତ ହେଲେ ନୟାପଲ୍ଲୀ ଅଞ୍ଚଳର ପ୍ରଶାନ୍ତ କୁମାର ନନ୍ଦ, ଚନ୍ଦ୍ରଶେଖରପୁରର ସମୀର ଦାସ, ସନ୍ତୋଷ ପାତ୍ର, ଚନ୍ଦ୍ରଭାନୁ ରାଉତ ଏବଂ ଏୟାରଫିଲ୍ଡ ଅଞ୍ଚଳ ସୂର୍ଯ୍ୟକାନ୍ତ ପରିଡା । ପ୍ରଶାନ୍ତ ନିକଟରୁ 11ଗ୍ରାମ ବ୍ରାଉନ ସୁଗାର, ଗୋଟେ ବାଇକ ଏବଂ ମୋବାଇଲ ଫୋନ ଜବତ କରିଥିବାବେଳେ ସମୀର, ସନ୍ତୋଷ ଓ ଭାନୁ ନିକଟରୁ 10 ଗ୍ରାମ ବ୍ରାଉନସୁଗାର ଜବତ କରାଯାଇଛି । ଏତତବ୍ୟତୀତ ସୂର୍ଯ୍ୟକାନ୍ତ ନିକଟରୁ ଦେଢ଼ କେଜି ଗଞ୍ଜେଇ ଓ ନଗଦ 8 ହଜାର ଟଙ୍କା ଜବତ କରିଛି କମିଶନରେଟ ପୋଲିସ । ଏହି ଚଢାଉ ପରେ ଆଗକୁ ଏଭଳି ସ୍ପେଶାଲ ଡ୍ରାଇଭ ଜାରି ରହିବା ବୋଲି ସୂଚନା ମିଳିଛି ।

ଏହି ସ୍ୱତନ୍ତ୍ର ଚଢାଉରେ ନିଶା ବେପାରୀଙ୍କ ନାଁରେ 30ଟି ମାମଲା ରୁଜୁ କରାଯାଇଛି । ଏହାଛଡା ନିଶା ବେପାରୀଙ୍କୁ ଗିରଫ କରି କୋର୍ଟ ଚାଲାଣ କରାଯାଉଛି । ସମସ୍ତ ନିଶା ବେପାରୀଙ୍କୁ 110ରେ ଚାର୍ଜସିଟ କରାଯିବ । ଯେଉଁ ସ୍ଥାନରେ ନିଶା କାରବାର କରାଯାଉଛି ସେ ସମ୍ବନ୍ଧରେ ବିଡିଏକୁ ଚିଠି ଲେଖାଯାଇଛି । ଯେଉଁ ଘରେ ଏପରି ନିଶା କାରବାର କରାଯାଉଛି ସେମାନଙ୍କ ଉପରେ ମଧ୍ୟ କଡା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ।

ନିଶା କାରବାର ଦ୍ୱାରା ସମାଜରେ କୁପ୍ରଭାବ ପଡ଼ୁଛି, ଯୁବପୀଢ଼ି ଏହା ଦ୍ୱାରା ଆକ୍ରାନ୍ତ ହେଉଛନ୍ତି। ସମାଜର ଯୁବପୀଢି ଯେଭଳି ଏସବୁରୁ ଦୂରେଇ ରୁହନ୍ତି ସେଥିପାଇଁ ବିଭିନ୍ନ ଶିକ୍ଷାନୁଷ୍ଠାନ ଉପରେ ନଜର ରଖିଛି ପୋଲିସ ।

ଭୁବନେଶ୍ବରରୁ ବିକାଶ ଦାସ, ଇଟିଭି ଭାରତ