ଭୁବନେଶ୍ବର: ଆଗକୁ ଆରମ୍ଭ ହେବ ଜନଗଣନା । ଏହା ପୂର୍ବରୁ ଭୁବନେଶ୍ବର ମହାନଗର ନିଗମ ପ୍ରସ୍ତୁତି ଆରମ୍ଭ କରିଦେଇଛି । ଏନେଇ ବିଏମସି ପକ୍ଷରୁ ଜନଗଣନା ପ୍ରଶିକ୍ଷଣ ଶିବିର କରାଯାଇଛି । ଗତ 6 ତାରିଖରୁ ଆରମ୍ଭ ହୋଇଥିବା ଏହି ଶିବିର ଶୁକ୍ରବାର ଶେଷ ହେବ । ପରେ ପୁଣି ଥରେ ଅଗଷ୍ଟ 12 ତାରିଖରୁ ଆରମ୍ଭ ହୋଇ ଅକ୍ଟୋବର 4 ତାରିଖ ପର୍ଯ୍ୟନ୍ତ ଚାଲିବା ନେଇ ସୂଚନା ରହିଛି ।
ତେବେ ଏହି ପ୍ରଶିକ୍ଷଣ ଶିବିର ଭୁବନେଶ୍ବରର 15 ନମ୍ବର ୱାର୍ଡ, ସାଲିଆ ସାହି, ନୟାପଲ୍ଲୀ ଏବଂ ଆଇଆରସି ଭିଲେଜ ଅଞ୍ଚଳରେ କରାଯିବ । ଏହି ପ୍ରଶିକ୍ଷଣ ଶିବିର ପାଇଁ 40 ଜଣ ସରକାରୀ ଶିକ୍ଷକଙ୍କୁ ପ୍ରଶିକ୍ଷଣ ଦିଆଯାଉଛି । ଏହା ବ୍ୟତିତ ଏମାନେ ନିଜର ଦୈନିକ ବିଦ୍ୟାଳୟ କାର୍ଯ୍ୟ ବ୍ୟତୀତ କ୍ଷେତ୍ର ପରିଦର୍ଶନ କରି ଗୃହ ତାଲିକା ଏବଂ ଜନଗଣନା କରିବେ ବୋଲି ବିଏମସି ଉପାୟୁକ୍ତ ଶ୍ୟାମ ସୁନ୍ଦର ସେଠୀ କହିଛନ୍ତି । ଅନ୍ୟପଟେ ଆସନ୍ତା ୨୦୨୦ ଏପ୍ରିଲରୁ ସେପ୍ଟେମ୍ବର ପର୍ଯ୍ୟନ୍ତ ଗୃହଗଣନା ଏବଂ ରାଷ୍ଟ୍ରୀୟ ଜନସଂଖ୍ୟା ରେଜିଷ୍ଟର ହେବା ନେଇ ସୂଚନା ରହିଛି ।
ଭୁବନେଶ୍ବରରୁ ସଞ୍ଜୀବ ରାୟ, ଇଟିଭି ଭାରତ