ରାଜଧାନୀରେ ଘରୋଇ ହସ୍ପିଟାଲ ପାଇଁ ନୂଆ ଗାଇଡଲାଇନ ଜାରି

ରାଜଧାନୀରେ ବିଭିନ୍ନ ଘରୋଇ ହସ୍ପିଟାଲରେ କାର୍ଯ୍ୟରତ କର୍ମଚାରୀଙ୍କ ପାଇଁ ବିଏମସି ଜାରି କରିଛି ନୂଆ ଗାଇଡଲାଇନ । ଏହିକ୍ରମରେ ରାଜଧାନୀର ବସ୍ତି ଅଞ୍ଚଳରେ ରହୁଥିବା ହସ୍ପିଟାଲ କର୍ମଚାରୀଙ୍କ ଡାଟାବେସ ପ୍ରସ୍ତୁତ କରିବା ପାଇଁ ଘରୋଇ ହସ୍ପିଟାଲ କର୍ତ୍ତୃପକ୍ଷଙ୍କୁ ନିର୍ଦ୍ଦେଶ ଦିଆଯାଇଛି ।

ଭୁବନେଶ୍ବର: ରାଜଧାନୀରେ ବିଭିନ୍ନ ଘରୋଇ ହସ୍ପିଟାଲରେ କାର୍ଯ୍ୟରତ କର୍ମଚାରୀଙ୍କ ପାଇଁ ବିଏମସି ଜାରି କରିଛି ନୂଆ ଗାଇଡଲାଇନ । ଏହିକ୍ରମରେ ରାଜଧାନୀର ବସ୍ତି ଅଞ୍ଚଳରେ ରହୁଥିବା ହସ୍ପିଟାଲ କର୍ମଚାରୀଙ୍କ ଡାଟାବେସ ପ୍ରସ୍ତୁତ କରିବା ପାଇଁ ଘରୋଇ ହସ୍ପିଟାଲ କର୍ତ୍ତୃପକ୍ଷଙ୍କୁ ନିର୍ଦ୍ଦେଶ ଦିଆଯାଇଛି । ଏଥିସହ ପ୍ରତ୍ୟେକ ଘରୋଇ ହସ୍ପିଟାଲରେ କାର୍ଯ୍ୟରତ କର୍ମଚାରୀ 14 ଦିନ ଯାଏଁ ଡ୍ୟୁଟି କରିବେ ଓ ସେମାନଙ୍କ ପାଇଁ ହସ୍ପିଟାଲ କର୍ତ୍ତୃପକ୍ଷ ରହଣି ବ୍ୟବସ୍ଥା କରିବେ ବୋଲି ସ୍ପଷ୍ଟ କରାଯାଇଛି ।

ରାଜଧାନୀରେ ଘରୋଇ ହସ୍ପିଟାଲ ପାଇଁ ନୂଆ ଗାଇଡଲାଇନ ଜାରି

ତେବେ 14 ଦିନର ଡ୍ୟୁଟି ପରେ ସମ୍ପୃକ୍ତ କର୍ମଚାରୀଙ୍କ କୋଭିଡ ପରୀକ୍ଷା କରାଯିବା ବାଧ୍ୟତାମୂଳକ ହୋଇଛି । ଟେଷ୍ଟିଂର ରିପୋର୍ଟ ନେଗେଟିଭ ଆସିଲେ ସେମାନଙ୍କୁ ଘରକୁ ପଠାଯିବ ଓ ପରବର୍ତ୍ତୀ ବ୍ୟାଚ୍‌ ହସ୍ପିଟାଲକୁ ଡ୍ୟୁଟି ପାଇଁ ଆସିବେ । ଏହିଭଳି ଭାବେ ପର୍ଯ୍ୟାୟକ୍ରମେ ହସ୍ପିଟାଲ କର୍ମଚାରୀମାନେ ଡ୍ୟୁଟି କରିବା ନେଇ ସୋମବାର ବିଏମସି ଗାଇଡଲାଇନରେ ସ୍ପଷ୍ଟ କରିଛି ।

କେବଳ ସେତିକି ନୁହେଁ, ରାଜଧାନୀର ପ୍ରତ୍ୟେକ ଘରୋଇ ହସ୍ପିଟାଲରେ ଜଣେ ଲେଖାଏଁ ଦାୟିତ୍ବବାନ ଅଧିକାରୀ ବା ନୋଡାଲ ଅଫିସର ରହିବେ । ସେମାନଙ୍କ ସମସ୍ତ ବିବରଣୀ ସହରାଞ୍ଚଳ ସ୍ବାସ୍ଥ୍ୟ ଅଧିକାରୀ, ଜନସ୍ବାସ୍ଥ୍ୟ ବିଭାଗ ପାଖରେ ମହଜୁଦ ରହିବ । ରାଜଧାନୀରେ ଦ୍ରୁତ ବେଗରେ ବଢିଚାଲିଥିବା ସଂକ୍ରମଣକୁ ନଜରରେ ବିଏମସି ଏପରି ପଦକ୍ଷେପ ନେଇଥିବା ଜଣା ପଡିଛି ।

ଭୁବନେଶ୍ବରରୁ ସଞ୍ଜୀବ ରାୟ, ଇଟିଭି ଭାରତ