ପୁରୀ: ଶେଷ ହେଲା ବିଜେପିର ରାଜ୍ୟସ୍ତରୀୟ ପ୍ରଶିକ୍ଷଣ ଶିବିର। 2024 ନିର୍ବାଚନ ପାଇଁ ପ୍ରସ୍ତୁତ ହେଲା ରୋଡ ମ୍ୟାପ। ମୋଦି ସରକାରଙ୍କ ଜନକଲ୍ୟାଣକାରୀ ଯୋଜନା ଓ ବିଜେଡି ସରକାରର ଦୁର୍ନୀତିକୁ ମୁଦ୍ଦା କରି ହେବ ନିର୍ବାଚନ ଲଢେଇ ।
ତିନିଦିନିଆ ପ୍ରଶିକ୍ଷଣ ଶିବିରରେ ରାଜ୍ୟ ଶାଖାକୁ ଗୁରୁମନ୍ତ୍ର ଦେଇଛନ୍ତି କେନ୍ଦ୍ରୀୟ ନେତୃତ୍ୱ । 2024 ନିର୍ବାଚନ ପାଇଁ ସମରସଜା ସରିଛି । ପ୍ରସ୍ତୁତ ହୋଇଛି ନୂଆ ରଣନୀତି । ଗତ ପଞ୍ଚାୟତ ନିର୍ବାଚନ ଓ ସାଧାରଣ ନିର୍ବାଚନର ତ୍ରୁଟିକୁ ସୁଧାରି ଆଗାମୀ ନିର୍ବାଚନ ପାଇଁ ପ୍ରସ୍ତୁତ ହେବାକୁ କ୍ଷେତ୍ର ପ୍ରସ୍ତୁତ ହୋଇଛି । ପ୍ରଭାରୀ, ସାଂଗଠନିକ ନେତୃତ୍ୱ, ଜିଲ୍ଲା ସଭାପତି,ସମ୍ପାଦକ,ରାଜ୍ୟ ନେତୃତ୍ୱ,ଏବଂ 2019 ନିର୍ବାଚନରେ ଲଢ଼ିଥିବା ସାଂସଦ ଓ ବିଧାୟକ ପ୍ରାର୍ଥୀଙ୍କୁ ନେଇ ଅନୁଷ୍ଠିତ ହୋଇଥିଲା ତିନି ଦିନିଆ ପ୍ରଶିକ୍ଷଣ ଶିବିର । ଶେଷ ଦିନରେ ଦଳକୁ ଗୁରୁମନ୍ତ୍ର ଦେଇ ଛନ୍ତି ରାଷ୍ଟ୍ରୀୟ ସଂଗଠନ ମହାମନ୍ତ୍ରୀ ବିଏଲ ସନ୍ତୋଷ ।
ରାଷ୍ଟ୍ର ଗଠନରେ ଭାରତୀୟ ଜନତା ପାର୍ଟିର ଅବଦାନକୁ ନେଇ ନେତୃତ୍ୱଙ୍କୁ ମାର୍ଗଦର୍ଶନ ଦେଇଛନ୍ତି ବିଏଲ ସନ୍ତୋଷ । ପ୍ରଥମ ଦୁଇ ଦିନରେ warm up ହୋଇଥିବା ରାଜ୍ୟ ନେତୃତ୍ୱଙ୍କୁ ଶେଷ ଦିନରେ ମିଳିଛି 2024 ନିର୍ବାଚନ ରୋଡ ମ୍ୟାପ । ଶେଷ ଦିବସରେ 4 ଟି ଶେସନରେ ପ୍ରଶିକ୍ଷଣ ଶେଷ ହୋଇଛି । ପ୍ରଥମ ଶେସନରେ ରାଜ୍ୟ ସଭାପତି ସମୀର ମହାନ୍ତି ପଲିଟିକାଲ ରୋଡ ମ୍ୟାପ ବିଷୟରେ ଆଲୋଚନା କରିଥିବା ବେଳେ ଦ୍ଵିତୀୟ ଶେସନରେ କେନ୍ଦ୍ର ସରକାରଙ୍କ ଗରିବ କଲ୍ୟାଣ ଯୋଜନା ଓ ବିଭିନ୍ନ ଲୋକାଭିମୁଖୀ ଯୋଜନା ବିଷୟରେ ଅବଗତ କରାଇଛନ୍ତି କେନ୍ଦ୍ରରେଳ ମନ୍ତ୍ରୀ ଅଶ୍ୱିନୀ ବୈଷ୍ଣବ । ତୃତୀୟ ଶେସନରେ କୃଷି ପ୍ରସଙ୍ଗ ଉପରେ ଆଲୋକପାତ କରିଛନ୍ତି ରାଷ୍ଟ୍ରୀୟ ଉପାଧ୍ୟକ୍ଷ ରାଧାମୋହନ ସିଂହ । ଶେଷ ତଥା ଅନ୍ତିମ ଶେସନରେ ରାଷ୍ଟ୍ରୀୟ ଗଠନରେ ଦଳର ଆଭିମୁଖ୍ୟ ଓ ଅବଦାନ ନେଇ ଅବଲୋକନ କରିଥିଲେ ରାଷ୍ଟ୍ରୀୟ ସଂଗଠନ ମହାମନ୍ତ୍ରୀ ବିଏଲ ସନ୍ତୋଷ ।