ଭୁବନେଶ୍ବର: ରାଜ୍ୟରେ ବିପର୍ଯ୍ୟସ୍ତ ଆଇନ ଶୃଙ୍ଖଳା, ମହିଳା ବିରୋଧୀ ହିଂସା, ଶିଶୁ ସୁରକ୍ଷା ପ୍ରସଙ୍ଗରେ ଆସନ୍ତାକାଲି (ଗୁରୁବାର) ଠାରୁ ପୁଣି ସରକାର ବିରୋଧରେ ମୈଦାନକୁ ଓହ୍ଲାଇବ ରାଜ୍ୟ ବିଜେପି ମହିଳା ମୋର୍ଚ୍ଚା । ଏନେଇ ରାଜ୍ୟ ବିଜେପି ମହିଳା ମୋର୍ଚ୍ଚା ସଭାପତି ସ୍ମୃତି ପଟ୍ଟନାୟକ ( BJP Mahila Morcha President Smruti Pattnaik) ଘୋଷଣା କରିଛନ୍ତି ।
ଓଡିଶାରେ ସୁଶାସନ ଚାଲିଛି ନା କୁଶାସନ: BJP ମହିଳା ମୋର୍ଚ୍ଚା ସଭାପତି
ବିଜେପି ମହିଳା ମୋର୍ଚ୍ଚା ସଭାନେତ୍ରୀ ସ୍ମୃତି ପଟ୍ଟନାୟକ ରାଜ୍ୟ ସରକାରଙ୍କୁ ପ୍ରଶ୍ନ କରିଛନ୍ତି ଓଡିଶାରେ ସୁଶାସନ ଚାଲିଛି ନା କୁଶାସନ ଚାଲିଛି? ମମିତା ମେହେର ପ୍ରସଙ୍ଗ ଉଠାଇ ଅଭିଯୋଗ କରିଛନ୍ତି ମମିତା ମେହେର ହତ୍ୟାକାଣ୍ଡ ଘଟଣାକୁ 74 ଦିନ ହୋଇଗଲାଣି । ଅକ୍ଟୋବର 8 ତାରିଖରେ ଘଟଣା ଘଟିଥିଲା । ବିଜେପି ଅନେକ ଥର ରାଜ୍ୟ ସରକାରଙ୍କୁ ନିଦରୁ ଉଠାଇବା ପାଇଁ ଚେଷ୍ଟା କରିଛି । ହେଲେ ରାଜ୍ୟ ସରକାର ବାରମ୍ବାର ଆଇନକୁ ବାଟବଣା କରୁଛନ୍ତି । 2021 ଜୁନ 14ରେ ଆଇଜି ଏସ ସାଇନୀଙ୍କୁ ମୁଖ୍ୟମନ୍ତ୍ରୀ ମହିଳା ହିସାଂର ସ୍ବତନ୍ତ୍ର ତଦନ୍ତ ପାଇଁ ନିଯୁକ୍ତ କରିଥିଲେ ।