ଲିଙ୍ଗରାଜ ଚତୁଃପାର୍ଶ୍ବ ଉଚ୍ଛେଦ ଘଟଣା, ସରକାରଙ୍କୁ ସମୟ ମାଗିଲା ବିଜେପି

ଲିଙ୍ଗରାଜ ଚତୁଃର୍ପାଶ୍ୱରେ ସୌନ୍ଦର୍ଯ୍ୟକରଣ ନିର୍ଦ୍ଧାରିତ ସମୟରେ ସାରିବାକୁ ରାଜ୍ୟ ସରକାରଙ୍କୁ ଦାବି କଲା ବିଜେପି । ଏକ ସାମ୍ବାଦିକ ସମ୍ମିଳନୀ କରି ସରକାରଙ୍କୁ ପୁଣି ଥରେ ପ୍ରଶ୍ନ କରିଛି ଦଳ ।

ଭୁବନେଶ୍ବର: ଲିଙ୍ଗରାଜ ମନ୍ଦିର ଚତୁଃପାର୍ଶ୍ବର ସୌନ୍ଦର୍ଯ୍ୟକରଣ ସାରିବା ସମୟ ଧାର୍ଯ୍ୟ କରିବାକୁ ସରକାରଙ୍କ ନିକଟରେ ଦାବି ଜଣାଇଲା ବିଜେପି । ଯେଉଁଭଳି ସରକାର ତରବର ହୋଇ ଉଚ୍ଛେଦ କରିଛନ୍ତି ତାକୁ ନେଇ ସରକାରଙ୍କୁ ଟାର୍ଗେଟ ମଧ୍ୟ କରିଥିଲା । ଏଥିସହ କ୍ଷତିଗ୍ରସ୍ତଙ୍କୁ ସହାୟତା ଦେବାକୁ ଦଳ କହିଛି । ବିଜେପିର ଉପସଭାପତି ସମୀର ମହାନ୍ତି ସାମ୍ବାଦିକ ସମ୍ମିଳନୀ କରି ପୁଣି ଥରେ ଲିଙ୍ଗରାଜ ଉଚ୍ଛେଦକୁ ନେଇ ସରକାରଙ୍କୁ ଏଭଳି କିଛି ପ୍ରଶ୍ନ କରିଥିଲେ ।

ସେ ଏହି ସମ୍ମିଳନୀରେ କହିଛନ୍ତି, ସୌନ୍ଦର୍ଯ୍ୟକରଣ ପ୍ରକ୍ରିୟାକୁ ଦଳ ସମର୍ଥନ କରୁଛି । ହେଲେ ତରବରିଆ ଓ ବିନା କୌଣସି ଘୋଷଣାରେ ଉଚ୍ଛେଦ କରିବା ଅତ୍ୟନ୍ତ ଦୁର୍ଭାଗ୍ୟଜନକ । ତେବେ ସରକାର ଉଚ୍ଛେଦକୁ ନେଇ ଘୋଷଣା କରିଥିବା ପ୍ୟାକେଜ ଓ ପ୍ଲାନିଂକୁ ପୁରୁଣା ଭୁବନେଶ୍ବରବାସୀଙ୍କ ନିକଟରେ ପ୍ରଦର୍ଶିତ କରିବା ସହ ଆଲୋଚନା ଓ ସହଯୋଗ ମାଧ୍ୟମରେ ଲିଙ୍ଗରାଜର ସୌନ୍ଦର୍ଯ୍ୟ ଓ ବିକାଶ କାର୍ଯ୍ୟ କରିବାକୁ ସେ କହିଛନ୍ତି ।

ଭୁବନେଶ୍ବରରୁ ବିକାଶ ଦାସ, ଇଟିଭି ଭାରତ