ଭୁବନେଶ୍ବର: ରାଜ୍ୟ ସରକାରଙ୍କ ଉପରେ ବର୍ଷିଲେ ରାଜ୍ୟ ବିଜେପି ସାଧାରଣ ସମ୍ପାଦିକା ଲେଖଶ୍ରୀ ସାମନ୍ତସିଂହାର। ସ୍ବାସ୍ଥ୍ୟ ଭିତ୍ତିଭୂମି ନେଇ ରାଜ୍ୟ ସରକାରଙ୍କୁ ଟାର୍ଗେଟ କରିଛନ୍ତି । ବୁଧବାର ସ୍ବାସ୍ଥ୍ୟ ଭିତ୍ତିଭୂମି ପାଇଁ ମୁଖ୍ୟମନ୍ତ୍ରୀ ଘୋଷଣା କରିଥିବା 8500 କୋଟି ଟଙ୍କାର ବ୍ରେକଅପ୍ ମାଗିଛନ୍ତି । ଏହି ଅର୍ଥ ଏବେର ନା ପୂର୍ବର ନା ଆଗକୁ ଖର୍ଚ୍ଚ କରିବେ ତାହାର ସ୍ପଷ୍ଟୀକରଣ ଦିଅନ୍ତୁ ମୁଖ୍ୟମନ୍ତ୍ରୀ ବୋଲି ସେ କହିଛନ୍ତି।
ରାଜ୍ୟରେ ନକଲି ଔଷଧ କାରବାରରେ ଜଣେ ବିଜେଡିର ଟାଣୁଆ ମନ୍ତ୍ରୀଙ୍କର ହାତ ଥିବା ଅଭିଯୋଗ କରିଛନ୍ତି ଲେଖଶ୍ରୀ । କ୍ରାଇମବ୍ରାଞ୍ଚ ଦ୍ବାରା ଏହାର ତଦନ୍ତ ହେବା ଅନୁଚିତ । ଡ୍ରଗ୍ସ କଂଟ୍ରୋଲରଙ୍କ ଦ୍ବାରା ଏହାର ତଦନ୍ତ ହେବା ଆବଶ୍ୟକ । କୌଣସି ନିୟମରେ ପୋଲିସ ତଦନ୍ତ କରିବାର ବ୍ୟବସ୍ଥା ନାହିଁ । ଦ୍ବିତୀୟ ଲହରୀରେ ଜଣାପଡ଼ିଲା ଓଡ଼ି଼ଶାରେ ସ୍ବାସ୍ଥ୍ୟ ଭିତ୍ତିଭୁମି ବିପର୍ଯ୍ୟସ୍ତ । ଏଭଳି ଘୋଷଣା କରି ଲୋକଙ୍କୁ ଭୁଆଁ ବୁଲୁଛନ୍ତି ସରକାର । ଡାକ୍ତର ଅଭାବ, କୋଭିଡ୍ ପରିଚାଳନାରେ ବିଫଳତା, ମୃତ୍ୟୁ ସଂଖ୍ୟା ଓ ପୀଡିତଙ୍କ ସଂଖ୍ୟା ଲୁଚାଇବା ପାଇଁ ଧୂଆଁବାଣ କରୁଛନ୍ତି ରାଜ୍ୟ ସରକାର । ଏମିତି ଘୋଷଣା କରି ରାଜ୍ୟ ସରକାର ନିଜ ବିଫଳତାର ଲୁଚାଇବାକୁ ଡାଇଭର୍ଟ ଷ୍ଟ୍ରାଟେର୍ଜୀ ଆପଣାଇଛନ୍ତି । ଲୋକ ସଂଖ୍ୟାକୁ ନେଇ ଯେତିକି ଡାକ୍ତର ରହିବା କଥା ଓଡିଶାରେ ନାହାନ୍ତି ବୋଲି ସେ ପ୍ରେସମିଟ ଜରିଆରେ କହିଛନ୍ତି ।
ଭୁବନେଶ୍ବରରୁ ତପନ ଦାସ,ଇଟିଭି ଭାରତ
