ଭୁବନେଶ୍ବର : ବିଜେପି ରାଜ୍ୟ ସଭାପତି ସମୀର ମହାନ୍ତିଙ୍କ ଅଭିଯୋଗର ଜବାବ ରଖିଛି ବିଜେଡି । ଦଳର ମୁଖପାତ୍ର ଲେନିନ ମହାନ୍ତି ଜରିଆରେ ପ୍ରତିକ୍ରିୟା ରଖିଛି ଦଳ । ଜଣେ ସଭାପତି ହିସାବରେ ନିରୁତ୍ସାହିତ କର୍ମୀଙ୍କ ମନରେ ସମୀର ଉତ୍ସାହ ଭରିବା ଲଗି ସମୀର, ଏପରି ବିବୃତ୍ତି ଦେଇଥିବା କହିଛନ୍ତି ଲେନିନ ।
ଲେନିନ କହିଛନ୍ତି ଯେ, ଆମେ ଜାଣୁ ଯେ ସମୀର ମହାନ୍ତି ହେଉଛନ୍ତି ବିଜେପିର ରାଜ୍ୟ ସଭାପତି । ତାଙ୍କର କର୍ତ୍ତବ୍ୟ ହେଉଛି ରାଜ୍ୟରେ ହତାଶ ହୋଇପଡିଥିବା ବିଜେପିର କର୍ମୀମାନଙ୍କ ମନୋବଳ ବଢାଇବା । ଯେଉଁଥିପାଇଁ ସେ ଆଜି ପୁଣି ଏକ ସାମ୍ବାଦିକ ସମ୍ମିଳନୀ କରିଛନ୍ତି । ଏକାଧିକ ଭିତ୍ତିହୀନ ଏବଂ ମନଗଢା ବିବୃତ୍ତିମାନ ଦେବାକୁ ସେ ଚେଷ୍ଟା କରିଛନ୍ତି । ପଶ୍ଚିମବଙ୍ଗରେ ପରାଜୟ ଏବଂ କର୍ଣ୍ଣାଟକ, ମଧ୍ୟପ୍ରଦେଶ, ଉତ୍ତର ପ୍ରଦେଶ ଏବଂ ଅନ୍ୟାନ୍ୟ ରାଜ୍ୟରେ ସାଂଗଠନିକ ସମସ୍ୟା ସୃଷ୍ଟି ହେବା ପରେ ଓଡିଶାର ବିଜେପି କ୍ୟାଡରମାନେ ଆତ୍ମବିଶ୍ବାସ ହରାଉଛନ୍ତି ।
ଏପରି ସ୍ଥିତିରେ କର୍ମୀଙ୍କ ମନରେ ସଞ୍ଜିବନୀ ଦେବାକୁ ଯାଇ ସମୀର ଏଭଳି ଅଭିଯୋଗ କରୁଥିବା କହିଛନ୍ତି ଲେନିନ । ଲେନିନ ଆହୁରି କହିଛନ୍ତି ଯେ, ଓଡିଶା ବିଜେପି ସଭାପତି ଗତ ଏକ ବର୍ଷ ମଧ୍ୟରେ ଉତ୍ତରପ୍ରଦେଶ, ହରିୟାଣା ଏବଂ ପଞ୍ଜାବରେ ଚାଲିଥିବା କୃଷକ ଆନ୍ଦୋଳନ ବିଷୟରେ ଉଲ୍ଲେଖ କରିବାକୁ ଅତି ସହଜରେ ଭୁଲି ଯାଇଛନ୍ତି । ଏଥିରୁ ଜଣାପଡୁଛି ଯେ ରାଜ୍ୟ ବିଜେପି ସଭାପତି ତାଙ୍କ ଦଳର ନିର୍ବାଚନୀ ଇସ୍ତାହାରକୁ ବି ଭୁଲି ଯାଇଛନ୍ତି ।