ଭୁବନେଶ୍ବର: 4 ଦଫା ଦାବି ନେଇ SRC ପ୍ରଦୀପ ଜେନାଙ୍କୁ ଭେଟିଛନ୍ତି ବିଜେପିର ରାଷ୍ଟ୍ରୀୟ ମୁଖପାତ୍ର ସମ୍ବିତ ପାତ୍ର । କଣାସ ବ୍ଲକକୁ ବନ୍ୟାଞ୍ଚଳ ଘୋଷଣା କରିବା ସହ ଅଞ୍ଚଳରେ ସ୍ଥାୟୀ ପ୍ରତିକାର ବ୍ୟବସ୍ଥା କରିବାକୁ ଦାବି କରିଛନ୍ତି ସମ୍ବିତ । ସୋମବାର ଏସଆରସିଙ୍କୁ ଭେଟିବାକୁ ସେ ଲୋକସେବା ଭବନ ଯାଇଥିଲେ । ତାଙ୍କ ସହ ସାକ୍ଷାତ କରିବା ପରେ ବିଜେପି ରାଷ୍ଟ୍ରୀୟ ମୁଖପାତ୍ର କହିଛନ୍ତି ଯେ, ''4 ଦଫା ଦାବି ନେଇ ଏସଆରସିଙ୍କୁ ଭେଟିଛି । କଣାସ ବ୍ଲକକୁ ବନ୍ୟା ଅଞ୍ଚଳ ଘୋଷଣା କରିବା ସହ ଅତିକମରେ ଗୋଟିଏ ମାସ ପର୍ଯ୍ୟନ୍ତ ରିଲିଫ ବା ରନ୍ଧା ଖାଦ୍ୟ ଯୋଗାଇ ଦିଆଯାଉ ।''
କ୍ଷତିଗ୍ରସ୍ତ କୃଷକ ମାନଙ୍କୁ ଯଥାଶୀଘ୍ର କ୍ଷତିପୂରଣ ଦିଆଯାଉ । ବନ୍ୟା ଦ୍ବାରା ସୃଷ୍ଟି ହୋଇଥିବା ଘାଇକୁ ମରାମତି କରାଯାଉ । ରାଜ୍ୟରେ ଦେଖା ଯାଉଥିବା ବନ୍ୟା ସମସ୍ୟାର ସ୍ଥାୟୀ ସମାଧାନକୁ ନେଇ ରାଜ୍ୟ ସରକାର ଏକ ଡିପିଆର ପ୍ରସ୍ତୁତ କରି କେନ୍ଦ୍ର ସରକାରଙ୍କୁ ଦିଅନ୍ତୁ ବୋଲି ସେ ଦାବି କରିଛନ୍ତି । ସମ୍ବିତ ଅଭିଯୋଗ କରିଛନ୍ତି ଯେ, ''ତ୍ରୁଟିପୂର୍ଣ୍ଣ ପରିଚାଳନା କାରଣରୁ ଚଳିତ ବର୍ଷ ବନ୍ୟା ହୋଇଛି । ଏହା ସଂପୂର୍ଣ୍ଣ ଭାବେ ମନୁଷ୍ୟକୃତ । ସରକାରଙ୍କ ଦାୟିତ୍ବହୀନତା ଯୋଗୁଁ ଲକ୍ଷ ଲକ୍ଷ ଲୋକମାନେ ଆଜି ନାହିଁନଥିବା ଦୁର୍ଦ୍ଦଶାର ସମ୍ମୁଖୀନ ହେଉଛନ୍ତି ।