ଭୁବନେଶ୍ବର: ରାଜ୍ୟର ପଶ୍ଚିମ ଏବଂ ଦକ୍ଷିଣ ଓଡିଶାର ୬ ଲକ୍ଷ ଓଡିଆ ଯେଭଳି (PMAY) ପ୍ରଧାନମନ୍ତ୍ରୀ ଆବାସ ଯୋଜନା (ଗ୍ରାମୀଣ) ରେ ଘର ନପାଇବେ ସେଥିଲାଗି ବିଜେପି ଷଡଯନ୍ତ୍ର କରୁଛି । ବିଜେପି ନେତା ପୃଥ୍ବୀରାଜ ହରିଚନ୍ଦନଙ୍କ ଆଜି ସାମ୍ବାଦିକ ସମ୍ମିଳନୀରୁ ସ୍ପଷ୍ଟ ହୋଇଛି ବୋଲି ବିଜେଡି ଅଭିଯୋଗ କରିଛି । ଏହା ଅତ୍ୟନ୍ତ ଦୁର୍ଭାଗ୍ୟପୂର୍ଣ୍ଣ ଏବଂ ଲଜ୍ଜାଜନକ ବୋଲି କହିଛନ୍ତି ବିଜେଡି ପ୍ରବକ୍ତା ଛବି ମାହାଲି ।
ବିଜେପି ସାମ୍ବାଦିକ ସମ୍ମିଳନୀର ଜବାବ ଦେଇ ବିଜେଡି ପ୍ରବକ୍ତା ଛବି ମାହାଲି କହିଛନ୍ତି ଯେ ପୃଥୀରାଜ କାହିଁକି ଓଡିଶା ବିରୋଧୀ ? ସେ କାହିଁକି ପଶ୍ଚିମ ଓଡିଶା ଏବଂ ଦକ୍ଷିଣ ଓଡିଶା ବିରୋଧୀ ? ସେ କାହିଁକି ଚାହୁଁ ନାହାଁନ୍ତି ଯେ ୬ ଲକ୍ଷ ଓଡ଼ିଆ କେବଳ ଏକ ମାସ ପାଇଁ ଆବାସ ପ୍ଲସ ପୋର୍ଟାଲ୍ ଖୋଲି ସେମାନଙ୍କ ଘର ପାଆନ୍ତୁ ? ପ୍ରଥମେ ପୃଥୀରାଜଙ୍କ ଦଳ କେବିକେ ଯୋଜନା, ବିଆରଜିଏଫ ଯୋଜନା ବନ୍ଦ କରି ଏସଟି ପାଣ୍ଠିକୁ ବନ୍ଦ କରିଦେଲା । ବର୍ତ୍ତମାନ ରାଜ୍ୟର ଆଦିବାସୀ ତଥା ପଛୁଆ ଅଞ୍ଚଳ ପାଇଁ ଘର ଦେବାକୁ ବି ବନ୍ଦ କରୁଛନ୍ତି ।