ପ୍ରାସଙ୍ଗିକତା ହରେଇ ସାରିଲେଣି ଲେଖାଶ୍ରୀ: ଏଲିନା

ହାଇଦର ପ୍ରସଙ୍ଗରେ ଲେଖାଶ୍ରୀଙ୍କ ମନ୍ତବ୍ୟ । ଲେଖାଶ୍ରୀଙ୍କୁ ପାଲଟା ଜବାବ ଦେଲେ ବିଜେଡି ମୁଖପାତ୍ର ଏଲିନା ଦାଶ । ଅଧିକ ପଢନ୍ତୁ...

ଭୁବନେଶ୍ବର: ହାଇଦର ପ୍ରସଙ୍ଗରେ ଲେଖାଶ୍ରୀ ସାମନ୍ତସିଂହାର ଦେଇଥିବା ମନ୍ତବ୍ୟ ଉପରେ ପ୍ରତିକ୍ରିୟା ରଖିଛି ବିଜେଡି । ଲେଖାଶ୍ରୀଙ୍କୁ କଠୋର ଭାଷାରେ ସମାଲୋଚନା କରିଛନ୍ତି ବିଜେଡି ମୁଖପାତ୍ର ଏଲିନା ଦାଶ ।

ଲେଖାଶ୍ରୀ ନିଜ ଦଳ ମଧ୍ୟରେ ଅପ୍ରାସଙ୍ଗିକ ହୋଇପଡ଼ିଛନ୍ତି । ପିପିଲି ଉପନିର୍ବାଚନରେ ପ୍ରାର୍ଥୀ ହେବା ଲାଗି ଲେଖାଶ୍ରୀ ବହୁତ ଦୌଡ଼ିଲେ । ଦଳ ତାଙ୍କୁ ଟିକେଟ ଦେଲାନାହିଁ । ସ୍ବାଭାବିକ ଭାବେ ସେ ହତାଶ ଓ ନିରାଶ ହୋଇପଡିଛନ୍ତି । ନିଜକୁ ପ୍ରାସଙ୍ଗିକ ରଖିବା ଲାଗି ପ୍ରତ୍ୟେକ ଦିନ ଗଣମାଧ୍ୟମକୁ ଡକେଇ ଅବାନ୍ତର, ଭିତ୍ତିହୀନ ଓ ମିଥ୍ୟା ବକ୍ତବ୍ୟ ଦେଉଛନ୍ତି । କୋରୋନାକୁ ନେଇ ଜନସାଧାରଣ ଚିନ୍ତିତ ଥିବାବେଳେ ଲେଖାଶ୍ରୀ ହାଇଦର ବାବଦରେ ଆଈ ମା କାହାଣୀ ଶୁଣାଉଛନ୍ତି । ଏହାଦ୍ୱାରା ଲେଖାଶ୍ରୀ ଲୋକହସା ହେଉଥିବା ଏଲିନା କହିଛନ୍ତି । ଏପରିକି ଭଗବାନ ତାଙ୍କୁ ସଦବୁଦ୍ଧି ଦିଅନ୍ତୁ ବୋଲି ଏଲିନା ପ୍ରାର୍ଥନା କରିଛନ୍ତି ।

ତେବେ ସୂଚନାଥାଉ କି, 'ହାଇଦର ତେଲେଙ୍ଗାନାରୁ ତେଲେଙ୍ଗାନା ପୋଲିସ ଦ୍ବାରା ଧରାହେବା ପରେ ଓଡ଼ିଶା ସରକାର ରାଜ୍ୟ ପୋଲିସ ପିଠି ଥାପୁଡାଉଛନ୍ତି । ହାଇଦର ମେଡିକାଲରେ ଥିବା ବେଳେ ପୋଲିସ ହୋଟେଲରେ ରହୁଥିଲା ଏବଂ ଯୁବତୀମାନଙ୍କୁ ଦାଦାବଟି ଆଦାୟରେ ଲଗାଉଥିଲା' ବୋଲି ଆଜି ବିଜେପି ରାଜ୍ୟ ସାଧାରଣ ସଂପାଦିକା ଲେଖାଶ୍ରୀ ସାମନ୍ତସିଂହାର ସାମ୍ବାଦିକ ସମ୍ମିଳନୀ ଜରିଆରେ ମନ୍ତବ୍ୟ ରଖିଥିଲେ । ଯାହାକୁ ନେଇ ବିଜେଡି ପ୍ରତିକ୍ରିୟାଶୀଳ ହୋଇଛି ।

ଭୁବନେଶ୍ବରରୁ ଭବାନୀ ଶଙ୍କର ଦାସ, ଇଟିଭି ଭାରତ