CISFର ନୂଆ ପ୍ରୟାସ, ବିମାନ ବନ୍ଦରରେ ସଂରକ୍ଷଣ କଲା ବର୍ଷାଜଳ

ଜଳ ଶକ୍ତି ଅଭିଯାନ ଆରମ୍ଭ କରିଛନ୍ତି ବିଜୁ ପଟ୍ଟନାୟକ ବିମାନ ବନ୍ଦରର CISF ଟିମ । ବର୍ଷା ଜଳ ସଂଗ୍ରହ କରି ଭୂତଳ ଜଳରେ ରୂପାନ୍ତରିତ କରିବାରେ ସଫଳ ହୋଇଛନ୍ତି ସେମାନେ ।

ଭୁବନେଶ୍ବର: ଜଳ ସଂରକ୍ଷଣର ନୂଆ ପ୍ରୟାସ । ଜଳ ହିଁ ଜୀବନ ହୋଇଥିବାବେଳେ ବିଜୁ ପଟ୍ଟନାୟକ ବିମାନ ବନ୍ଦରରେ ଆରମ୍ଭ ହୋଇଛି ଭୂତଳ ଜଳ ସଂରକ୍ଷଣ । ବର୍ଷା ଜଳ ସଞ୍ଚୟ କରି ଭୂତଳ ଜଳରେ ରୂପାନ୍ତର କରିବାରେ ସଫଳ ହୋଇଛନ୍ତି ବିମାନ ବନ୍ଦରରେ ନିୟୋଜିତ କେନ୍ଦ୍ରୀୟ ଉଦଯୋଗ ସୁରକ୍ଷା ବଳ ବା CISF ।

CISF ୟୁନିଟ, ଭୁବନେଶ୍ବର ବିମାନ ବନ୍ଦରରେ ପାଣି ସଞ୍ଚୟ କେନ୍ଦ୍ର କରି ଭୂତଳ ଜଳକୁ ରୂପାନ୍ତରିତ କରିଛନ୍ତି । ବର୍ଷା ଜଳକୁ ସଂଗ୍ରହ କରି ଭୂତଳରେ ସଞ୍ଚୟ କରାଯାଉଛି । ତେବେ CISF ସଦସ୍ୟମାନେ ‘ଫନି’ସମୟରେ ନଷ୍ଟ ହୋଇଯାଇଥିବା ପାଣି ଟାଙ୍କିମାନଙ୍କୁ ବ୍ୟବହାର କରି ସ୍ବ ଉଦ୍ୟମରେ ଏହାକୁ ପ୍ରସ୍ତୁତ କରିଛନ୍ତି ।

ତେବେ ଏହି ଭୂତଳ ଜଳ ସଂରକ୍ଷଣକୁ ଉଦଘାଟନ କରିଛନ୍ତି ଭୁବନେଶ୍ବର ବିଜୁ ପଟ୍ଟନାୟକ ବିମାନ ବନ୍ଦର ନିର୍ଦ୍ଦେଶକ ସୁରେନ୍ଦ୍ର ଚନ୍ଦ୍ର ହୋତା । ଏହା ବ୍ୟତୀତ ସେଠାରେ ଯୁଗ୍ମ ମହାନିର୍ଦ୍ଦେଶକ, କେନ୍ଦ୍ରୀୟ ପରିସଂଖ୍ୟନ ବିଭାଗ, ଡେପୁଟି କମାଣ୍ଡାଣ୍ଟ, ଆସିଷ୍ଟାଣ୍ଟ କମାଣ୍ଡାଣ୍ଟ ଓ ବିମାନବନ୍ଦରର ବହୁ ଅଧିକାରୀ ଉପସ୍ଥିତ ରହି ଏହି ପ୍ରୟାସକୁ ପ୍ରଶଂସା କରିଥିଲେ । ଭବିଷ୍ୟତରେ ମଧ୍ୟ ଏପରି ଅନେକ ଜଳ ସଂରକ୍ଷଣ କେନ୍ଦ୍ର ତିଆରି କରିବାକୁ ଯୋଜନା ଜାରି ରହିଛି ବୋଲି କହିଛନ୍ତି ବିମାନ ବନ୍ଦର ନିର୍ଦ୍ଦେଶକ ।

ଭୁବନେଶ୍ବରରୁ ତାପସ ପରିଡା, ଇଟିଭି ଭାରତ