ଓସିଏ ନିର୍ବାଚନ; ଭୋଟ ଦେବେ ଆଶୀର୍ବାଦ ବେହେରା !

ଗିରଫ ପରେ ବି ଭୋଟ ଦେଇପାରନ୍ତି ଆଶୀର୍ବାଦ ବେହେରା । ଆସନ୍ତା ୨୭ ତାରିଖରେ ଓସିଏ ନିର୍ବାଚନ ହେବାକୁ ଥିବା ବେଳେ ଭୋଟ ଦେବାକୁ ଜେଲ ବିଭାଗକୁ ଅନୁମତି ମାଗିଛନ୍ତି ସେ।

ଭୁବନେଶ୍ବର: ଓସିଏ ନିର୍ବାଚନରେ ଭୋଟ ଦେଇପାରନ୍ତି ଆଶୀର୍ବାଦ ବେହେରା । ଏନେଇ ଜେଲ ବିଭାଗକୁ ଚିଠି ଲେଖିଛନ୍ତି ପୂର୍ବତନ ଓସିଏ ସମ୍ପାଦକ ତଥା ଏଟି ଚିଟଫଣ୍ଡରେ ଗିରଫ ହୋଇଥିବା ଆଶୀର୍ବାଦ ବେହେରା । ଏହା ସହ ଓସିଏ ପକ୍ଷରୁ ମଧ୍ୟ ଆଶୀର୍ବାଦଙ୍କୁ ଭୋଟ ଦେବାକୁ ଅନୁମତି ଦିଆଯାଉ ବୋଲି ଅନୁରୋଧ କରାଯାଇଛି ।

ତେବେ ଆସନ୍ତା ୨୭ ତାରିଖରେ ହେବାକୁ ଯାଉଛି ଓସିଏ ନିର୍ବାଚନ । ଏପଟେ ଗିରଫ ପରେ ଆଶୀର୍ବାଦଙ୍କ ସ୍ବାସ୍ଥ୍ୟ ଅବସ୍ଥା ଖରାପ ଯୋଗୁ ସେ କ୍ୟାପିଟାଲ ହସ୍ପିଟାଲରେ ଚିକିତ୍ସିତ ହେଉଛନ୍ତି। ବ୍ୟକ୍ତିଗତ ଭାବେ ବାଲାଟ ଅଣାଯାଇ ଭୋଟ ଦେଇପାରନ୍ତି ବୋଲି ସୂଚନା ମିଳିଛି।

ତେବେ ଓସିଏ ନିର୍ବାଚନରେ ମୋଟ 6ଟି ପଦ ପାଇଁ 12 ଜଣ ପ୍ରାର୍ଥୀ ନାମାଙ୍କନପତ୍ର ଦାଖଲ କରିଛନ୍ତି । ସଭାପତି ପଦ ପାଇଁ 2ଜଣ, ଉପସଭାପତି 2 ଜଣ, ସମ୍ପାଦକ ପାଇଁ 2 ଜଣ, ଯୁଗ୍ମ ସମ୍ପାଦକ 2ଜଣ ଓ ଟ୍ରେଜରର୍ ପାଇଁ 3 ଜଣ ପ୍ରାର୍ଥୀ ନାମାଙ୍କନ ଭରିଛନ୍ତି । ସେହିପରି ସମ୍ପାଦକ ପଦ ପାଇଁ ଆଶୀର୍ବାଦ ବେହେରାଙ୍କ ପୁଅ ସଞ୍ଜୟ ବେହେରା ଲଢୁଥିବା ବେଳେ ବିପକ୍ଷରେ ଅଛନ୍ତି ନବ ରଞ୍ଜନ ପଟ୍ଟନାୟକ।

ଭୁବନେଶ୍ବରରୁ ତାପସ ପରିଡ଼ା, ଇଟିଭି ଭାରତ