ଭୁବନେଶ୍ବର: ଅର୍ଥତତ୍ତ୍ବ ଚିଟଫଣ୍ଡ ଠକେଇ ମାମଲାରେ ଓଡ଼ିଶା କ୍ରିକେଟ ଆସୋସିଏସନ୍ (ଓସିଏ)ର ପୂର୍ବତନ ସଂପାଦକ ଆଶୀର୍ବାଦ ବେହେରାଙ୍କୁ ଗୁରୁବାର କଟକରୁ ଗିରଫ କରିଥିଲା ସିବିଆଇ । ଆଶୀର୍ବାଦଙ୍କ ସହିତ ହୋଟେଲ ମାଲିକ କମଳାକାନ୍ତ ଦାସଙ୍କୁ ମଧ୍ୟ ଗିରଫ କରିଥିଲା ସିବିଆଇ । ଏବେ କମଳାକାନ୍ତ ଦାସଙ୍କ ସ୍ବାସ୍ଥ୍ୟଗତ ଦୃଷ୍ଟିକୋଣକୁ ନଜରରେ ରଖି ଜାମିନ ପ୍ରଦାନ କରିବା ପାଇଁ ଅପିଲ କରାଯାଇଛି । ଶୁଣାଣି ଶେଷ ହେବା ସହ ରାୟ ସଂରକ୍ଷିତ ରଖାଯାଇଥିବା ତାଙ୍କ ଓକିଲ ଜ୍ଞାନ ମହାନ୍ତି ସୂଚନା ଦେଇଛନ୍ତି ।
ଫଟୋ ସୌଜନ୍ୟ: ସମ୍ବାଦଦାତା, ଭୁବନେଶ୍ବର
ସୂଚନା ଅନୁଯାୟୀ, କିଛି ଦିନ ତଳେ ଅର୍ଥତତ୍ତ୍ୱ ଚିଟ୍ଫଣ୍ଡ ମାମଲାରେ ସିବିଆଇ ପ୍ରାଥମିକ ଚାର୍ଜସିଟ କୋର୍ଟରେ ଦାଖଲ କରିଥିଲା । ଆଶୀର୍ବାଦଙ୍କ ସହ ଅନ୍ୟ ଦୁଇ ଜଣଙ୍କ ନାମରେ ଏହି ଚାର୍ଜସିଟ ଦାଖଲ କରିଥିଲା ସିବିଆଇ । ଅନ୍ୟ ଦୁଇ ଜଣ ଥିଲେ ହୋଟେଲ ସୋଲାନ ଇନ୍ର ମାଲିକ କମଳାକାନ୍ତ ଦାସ ଓ ଏଟି ଗ୍ରୁପ୍ ନିର୍ଦ୍ଦେଶକ ସମ୍ବିତ ଖୁଣ୍ଟିଆ । ୨୦୧୪ ରେ ସମ୍ବିତଙ୍କୁ ଗିରଫ କରାଯାଇଥିଲା ବେଳେ ଗୁରୁବାର ଆଶୀର୍ବାଦ ଓ କମଳାକାନ୍ତଙ୍କୁ ଗିରଫ କରାଯାଇଛି ।
ଏବେ ଏହି ଗିରଫ ପରେ କମଳାକାନ୍ତଙ୍କ ଓକିଲ ପକ୍ଷ ରଖିଛନ୍ତି । ଯେହେତୁ ସିବିଆଇର ଜେରା ସମୟରେ କମଳାକାନ୍ତ ସମସ୍ତ ପ୍ରକାର ସହଯୋଗ କରିଥିଲେ ତାଙ୍କ ନାମରରେ ଏନବିଡବ୍ଲ୍ୟୁ ଜାରି କରି ଗିରଫ କରିବା ଅନୁଚିତ ଥିଲା । ଏହାସହ କମଳାକାନ୍ତ ଦାସଙ୍କ ଲିଭର ସମସ୍ୟା ପାଁଇ ସେ ହସ୍ପିଟାଲରେ ରହିଥିବା କାରଣ ଦର୍ଶାଇଛନ୍ତି । ଏତ୍ଦବ୍ୟତୀତ ତାଙ୍କ ନାମରେ କୌଣସି ପ୍ରକାର ଅଭିଯୋଗ ନଥିବାରୁ ପୂର୍ବରୁ ତାଙ୍କୁ ସିବିଆଇ ଗିରଫ କରିନଥିବା କଥା ସେ କହିଛନ୍ତି । ଏହାସହ ସେ ସିବିଆଇ ଅଭିଯୋଗ ଉପରେ କହିଛନ୍ତି ଯେ କମଳାକାନ୍ତ ଦାସ କୌଣସି ଟଙ୍କା ହଡପ କରିନାହାନ୍ତି । ସମସ୍ତ କାଗଜ ରହିଛି ଓ କୋର୍ଟରେ ଦାଖଲ କରାଯାଇଛି ।
ଏଠାରେ ସୂଚନା ଯୋଗ୍ୟ ଯେ ସୋନାଲ ଇନ୍ ହୋଟେଲ ମାଲିକ କମଳାକାନ୍ତ ଦାସଙ୍କ ନାମରେ 5 କୋଟି 75 ଲକ୍ଷ ଟଙ୍କା ହଡପ କରିଥିବା ଅଭିଯୋଗ ହୋଇଛି । ପାୱାର ଅଫ ଆଟୋନମି ବଳରେ ବାଲେଶ୍ବର ଏବଂ ଭୁବନେଶ୍ବରେ ଦୁଇଟି ଜମି ଏଟି ମୁଖ୍ୟ ଠାରୁ ଆଣିଥିଲେ କମଳାକାନ୍ତ । ପରବର୍ତ୍ତୀ ମୁହୂର୍ତ୍ତରେ ଜମି ବିକ୍ରି କରିଥିଲେ ମଧ୍ୟ ଟଙ୍କାଟିଏ ବି ଏଟି ମୁଖ୍ୟକୁ ଦେଇନଥିଲେ । ଗିରଫ ପରେ ପ୍ରଦୀପ ସେଠୀ ସିବିଆଇ ଆଗରେ ଏସବୁ ଖୁଲାସା କରିଥିଲେ ।
ଭୁବନେଶ୍ବରରୁ ବିକାଶ ଦାସ, ଇଟିଭି ଭାରତ
