ଭୁବନେଶ୍ବର: ଲେଡ଼ି ବ୍ଲାକମେଲର ଅର୍ଚ୍ଚନା ନାଗ (Lady Blackmailer Archana Nag) ଙ୍କ କେସ ଲଢିବାକୁ ଅନେକ ଓକିଲ ଆଶାୟୀ । କୋର୍ଟରେ ଅର୍ଚ୍ଚନାଙ୍କ କେସ ଲଢିବାକୁ ଅନେକ ଓକିଲ ଆବେଦନ କରିଥିଲେ । ହେଲେ ଅର୍ଚ୍ଚନାଙ୍କ କେସ କିଏ ଲଢିବ ସେ ନେଇ ଖୋଦ ଅର୍ଚ୍ଚନା ନିଷ୍ପତ୍ତି ନେଇଛନ୍ତି । ଏସଡିଜେଏମ (SDJM) କୋର୍ଟରେ ଭିଡ଼ିଓ କନଫରେନ୍ସିଂ ଜରିଆରେ ସେ ହାଜର ହୋଇ ନିଜ ଓକିଲ ବାଛିଛନ୍ତି । ଆଇନଜୀବୀ ଦେବାଶିଷ ମହାପାତ୍ରଙ୍କୁ ଓକିଲ ଭାବେ ନିଯୁକ୍ତ କରିଛନ୍ତି ଅର୍ଚ୍ଚନା ।
ଅର୍ଚ୍ଚନାଙ୍କ ଓକିଲାତି ପାଇଁ ଅନେକ ଆଶାୟୀ, ଭିଡି଼ଓ କନଫେରନ୍ସରେ କଲେ ଓକିଲ ଚୟନ ଅନେକ ଆଶାୟୀ ଓକିଲଙ୍କ ମଧ୍ୟରେ ସେ ଆଇନଜୀବୀ ଦେବାଶିଷ ମହାପାତ୍ରଙ୍କୁ ଚୟନ କରିଛନ୍ତି । ଅର୍ଚ୍ଚନାଙ୍କ ପାଇଁ କେସ ଲଢିବାକୁ ଥିବା ଆଇନଜୀବୀ ଦେବାଶିଷ ନିଜ ପ୍ରତିକ୍ରିୟାରେ କହିଛନ୍ତି, " ଅର୍ଚ୍ଚନାଙ୍କୁ ନିର୍ଦ୍ଦୋଷ ଦର୍ଶାଇବା ପାଇଁ ଅନେକ ପ୍ରମାଣ ରହିଛି । ତେଣୁ ପୁରା ରେକର୍ଡ ପାଇବା ପରେ ସେ ଜାମିନ ପାଇଁ ଆବେଦନ କରିବେ । ଏନେଇ କୌଣସି ଆବେଦନ ହୋଇନାହିଁ କେବଳ ଏସଡିଜେଏମ କୋର୍ଟରେ ଓକିଲଙ୍କୁ ଲଢିବାକୁ ପାଓ୍ବାର ଦେଇଛନ୍ତି କୋର୍ଟ ।"
ତେବେ ଅର୍ଚ୍ଚନାଙ୍କ ନାଁରେ ଥିବା ୧୬ଟି ଦଫାରୁ କିଛି ବେଲେବଲ୍ ଓ ନନବେଲେବଲ୍ (bailable and non bailable)ରହିଛି । ତେଣୁ ତଳ କୋର୍ଟରେ ଜାମିନ ନମିଳିଲେ ସେସନ କୋର୍ଟ ଯିବେ ବୋଲି ସେ କହିଛନ୍ତି । ସୂଚନା ଥାଉ କି ଅର୍ଚ୍ଚନାଙ୍କ ଗିରଫ ଘଟଣାରେ ଜାମିନ ପ୍ରସଙ୍ଗର ଶୁଣାଣି ହୋଇଥିଲା । ସୁରକ୍ଷା ଦୃଷ୍ଟିରୁ ଭିସି ଯୋଗେ ଶୁଣାଣି ହୋଇଥିଲା । ଭିସି ଯୋଗେ ଅର୍ଚ୍ଚନା କୋର୍ଟରେ ହାଜର ହୋଇ ଝାରପଡା ଜେଲରେ ନିଜ ପକ୍ଷ ରଖିଥିଲେ ।
ଏହା ବି ପଢନ୍ତୁ- ଭିଡିଓ କନଫରେନ୍ସରେ ହାଜର ହେଲେ ବ୍ଲାକମେଲର ଅର୍ଚ୍ଚନା, ଚାଲିଛି ଜାମିନ୍ ଆବେଦନର ଶୁଣାଣି
ଗତକାଲି (ସୋମବାର) ଏନେଇ ଶୁଣାଣି ହେବାର ଥିଲା । ଯେହେତୁ ଦୁଇ ଜଣ ଓକିଲ କୋର୍ଟରେ ଆବେଦନ କରିଥିଲେ ସେ ନେଇ କିଏ ତାଙ୍କ ଓକିଲ ଚିହ୍ନଟ ପାଇ ଆଜି ତାଙ୍କୁ କୋର୍ଟରେ ହାଜର ହେବା ପାଇଁ କୁହାଯାଇଥିଲା । ଅର୍ଚ୍ଚନା ହାଜର ହୋଇ ନିଜ ପାଇଁ ଓକିଲ ବାଛିଛନ୍ତି । ଲେଡ଼ି ବ୍ଲାକମେଲର ଅର୍ଚ୍ଚନା ନାଗ ଚାନ୍ଦଙ୍କ ସ୍ବାମୀ ହେଉଛନ୍ତି ସ୍ବାମୀ ଜଗବନ୍ଧୁ ଚାନ୍ଦ । ମହିଳା ଜଣକ ଉଚ୍ଚ ଶିକ୍ଷିତା ଓ ଆଇନ ପାଠ ପଢିଥିବା ଜଣାପଡିଛି ।
ସ୍ବାମୀ ଜଗବନ୍ଧୁ ଚାନ୍ଦ ସହାୟତାରେ ଏଭଳି କଳା କାରନାମାରେ କରୁଥିବା ସନ୍ଦେହ ହେଉଛି । ତାଙ୍କ ଫାସରେ ଅନେକ ନାମିଦାମି ବ୍ୟକ୍ତି ରହିଛନ୍ତି । ବ୍ଲାକ ମେଲରଙ୍କ ହାଇପ୍ରୋଫାଇଲ ପଲିଟିକାଲ ଲିଙ୍କ ରହିଛି । ଭୁବନେଶ୍ବର ସତ୍ୟବିହାର ଅଞ୍ଚଳରେ ଏକ ବ୍ୟୟବହୁଳ ବଙ୍ଗଳା ମଧ୍ୟ ତିଆରି କରିଛନ୍ତି । କୋଟି କୋଟି ଟଙ୍କା ଖର୍ଚ୍ଚରେ ତିଆରି ହୋଇଛି ଏହି ବିଳାସପୂର୍ଣ୍ଣ ବଙ୍ଗଳା । ବଙ୍ଗଳା ଭିତରେ ରହିଛି ନାମୀ ଦାମି କଂପାନୀର ସାମଗ୍ରୀ । ବଡ ପ୍ରଶ୍ନ ଏହି ଲେଡି ବ୍ଲାକମେଲର ଅର୍ଚ୍ଚନା ନାଗଙ୍କ ପାଖକୁ କୁଆଡୁ ଆସୁଥିଲା ଏତେ ଟଙ୍କା ।
ପୂର୍ବତନ ମନ୍ତ୍ରୀ ତଥା ବିଜେଡିର ବରିଷ୍ଠ ନେତା ସୂର୍ଯ୍ୟନାରାୟଣ ପାତ୍ରଙ୍କ ସହିତ ଏହି ଲେଡିଙ୍କ ସ୍ବାମୀ ଜଗବନ୍ଧୁଙ୍କ ଫଟୋ ସୋସିଆଲ ମିଡିଆରେ ଭାଇରାଲ ହେଉଛି । ଲେଡି ଜଣଙ୍କ ସୁଚିନ୍ତିତ ଢଙ୍ଗରେ ନେତାଙ୍କ ସହିତ ରଖୁଥିଲେ ସମ୍ପର୍କ । ପ୍ରଥମେ ବନ୍ଧୁତ୍ବ ଆଉ ତାପରେ ପ୍ରେମ ଆଳାପ । ସମ୍ପର୍କ ଟିକିଏ ପୁରୁଣା ହେବା ପରେ ହୋଟେଲକୁ ଡାକରା । ସେଠାରେ ଅନ୍ତରଙ୍ଗ ମୁହୁର୍ତ୍ତର ଭିଡିଓ କରି କିମ୍ବା ଫଟୋ ଉଠାଇ ବ୍ଲାକ ମେଲିଂ । କିଛି ଏପରି ଢଙ୍ଗରେ ବ୍ଲାକମେଲ କରି ନେତାଙ୍କ ଠାରୁ ଟଙ୍କା ଆଦାୟ କରୁଥିବା ନେଇ ଅଭିଯୋଗ ହୋଇଛି ।
ଇଟିଭି ଭାରତ, ଭୁବନେଶ୍ବର
