ଭୁବନେଶ୍ବର: ଆଜି (ଶୁକ୍ରବାର) ଚିଲିକା ବୁଲିବେ ସମସ୍ତ ବିଧାୟକ, ମନ୍ତ୍ରୀ ଓ ବାଚସ୍ପତି । ସେଠାରେ ମା' କାଳିଜାଈଙ୍କୁ ଦର୍ଶନ କରିବା ସହ ନୌସେନା ଦ୍ବାରା ଚିଲିକାରେ ସ୍ବତନ୍ତ୍ର ଭାବରେ ଅନୁଷ୍ଠିତ ହେବାକୁ ଥିବା ସମର ଅଭ୍ୟାସକୁ ଦେଖିବେ । ଏହାପରେ ସନ୍ଧ୍ୟା ସମୟରେ ପୁଣି ରାଜଧାନୀଙ୍କୁ ପ୍ରତ୍ୟାବର୍ତ୍ତନ କରିବେ ବୋଲି ସୂଚନା ମିଳିଛି ।
ବିଧାନସଭାରୁ ବାହାରି ସ୍ବତନ୍ତ୍ର ବସ ଯୋଗେ ସମସ୍ତ ବିଧାୟକ ଓ ମନ୍ତ୍ରୀମାନେ ଚିଲିକା ବୁଲିବାକୁ ଯିବେ । ଏଥିଲାଗି ନୌସେନା ତଥା ନାଭାଲ ଅଧିକାରୀଙ୍କ ପକ୍ଷରୁ ସ୍ବତନ୍ତ୍ର ନିମନ୍ତ୍ରଣ ରହିଛି । ତେବେ ସୂଚନା ଥାଉ କି ପୂର୍ବରୁ ମଧ୍ୟ ବିଧାୟକମାନେ ଏପରି ନିମନ୍ତ୍ରଣ ପାଇବା ପରେ ବୁଲିବାକୁ ଯାଇଥିବା ନଜିର ଅଛି । ଗତ ୨୦୨୦ ମସିହାରେ ବିଧାୟକମାନେ ପାରାଦ୍ବୀପ ବନ୍ଦରକୁ ଯାଇଥିଲେ । ନୌସେନାର ଯୁଦ୍ଧ ଜାହାଜରେ ସମୁଦ୍ର ଭିତରକୁ ଯାଇ ସେଠାରେ ହେଉଥିବା ସମର ଅଭ୍ୟାସକୁ ଦେଖିଥିଲେ ବୋଲି ଜଣାପଡ଼ିଛି ।
ଭୁବନେଶ୍ବରରୁ ସଞ୍ଜୀବ କୁମାର ରାୟ, ଇଟିଭି ଭାରତ