ବ୍ୟାଘ୍ର ପ୍ରକଳ୍ପ ବିଫଳ ହେବା କହିବା ଠିକ୍ ହେବନି: ପିସିସିଏଫ

ବାଘୁଣୀ ସୁନ୍ଦରୀକୁ ମଧ୍ୟପ୍ରଦେଶ କାହ୍ନାକୁ ଫେରାଇ ନେବାକୁ ଏନଟିସିଏ ଚିଠି ଲେଖିବା ପରେ ସଫେଇ ରଖିଲେ ବନବିଭାଗ କର୍ତ୍ତୃପକ୍ଷ ।

ଭୁବନେଶ୍ବର: ବାଘୁଣୀ ସୁନ୍ଦରୀକୁ ମଧ୍ୟପ୍ରଦେଶ କାହ୍ନାକୁ ଫେରାଇ ନେବାକୁ ଏନଟିସିଏ ଚିଠି ଲେଖିବା ପରେ ସଫେଇ ରଖିଲେ ବନବିଭାଗ କର୍ତ୍ତୃପକ୍ଷ । ଚିଫ୍ ୱାଇଲ୍ଡ ଲାଇଫ୍ ୱାର୍ଡେନ କହିଲେ, ବ୍ୟାଘ୍ର ପ୍ରକଳ୍ପ ବିଫଳ ହେବା କହିବା ଠିକ୍ ହେବନି । ସ୍ଥାନୀୟ ଲୋକଙ୍କ ଆନ୍ଦୋଳନ ଯୋଗୁଁ ସୃଷ୍ଟି ହୋଇଥିଲା ଅସୁବିଧା ।

ଆନ୍ତରାଜ୍ୟ ବ୍ୟାଘ୍ର ପ୍ରକଳ୍ପ ବିଫଳ ହେବା ନେଇ ରାଜ୍ୟ ସରକାରଙ୍କୁ ଚିଠି ଲେଖି ଜଣାଇଥିଲା ଏନଟିସିଏ । ହେଲେ ବନ ବିଭାଗର ଚରମ ଅବହେଳା ପାଇଁ ବ୍ୟାଘ୍ର ସ୍ଥାନାନ୍ତରଣ ପ୍ରକଳ୍ପକୁ ବନ୍ଦ କରିଦେଇଛି ଏନଟିସିଏ । ତେବେ ଦେଶରେ ବାଘ ବଂଶ ବୃଦ୍ଧି କରିବାକୁ ଆରମ୍ଭ ହୋଇଥିବା ଉଦ୍ୟମ କ୍ରମେ ୨୦୧୮ରେ ମଧ୍ୟପ୍ରଦେଶର କାହ୍ନା ଓ ବାନ୍ଧବଗଡ ଅଭୟାରଣ୍ୟରୁ ଦୁଇଟି ବାଘଙ୍କୁ ସାତକୋଶିଆ ଅଭୟାରଣ୍ୟକୁ ଅଣାଯାଇଥିଲା । ତୁରନ୍ତ ଏହି ବାଘୁଣୀକୁ କାହ୍ନା ଅଭୟାରଣ୍ୟର ଘୋରେଲା କେନ୍ଦ୍ରକୁ ନେବା ପାଇଁ ଗୁରୁବାର କଡା ଚିଠି ଲେଖି ଜଣାଇଛି ଏନଟିସିଏ ।

ଏହାସହ କଟକରୁ ବଜ୍ରକାପ୍ତା ଚାଲାଣ ଘଟଣାରେ ଜଣେ କୁଖ୍ୟାତ ମାଫିଆ ମାଧବ ପାତ୍ରକୁ ଗୋଡ଼ିସାହିରୁ ଗିରଫ କରିଛି । ମାଫିଆ ମାଧବ ନାଁରେ ବଜ୍ରକାପ୍ତା ଭିଡ଼ିଓ ବନବିଭାଗ ହାତରେ ଲାଗିଥିଲା । ତଦନ୍ତ ପରେ ତାଙ୍କୁ ଗିରଫ କରିଛି ବନବିଭାଗ । ଗିରଫ ମାଧବଙ୍କ ଠାରୁ ଅନେକ ଗୁରୁତ୍ବପୂର୍ଣ୍ଣ କାଗଜପତ୍ର ଜବତ କରାଯାଇଛି । ତେବେ ପୁରୁଣା କୋଡ଼ିଏ ପଇସା ଓ କଣା ପଇସା କୋଡ଼ରେ ଏହି ବଜ୍ରକାପ୍ତା ରାକେଟ ଚାଲିଥିବା ଜଣାପଡ଼ିଛି ।

ଭୁବନେଶ୍ବରରୁ ତପନ ଦାସ, ଇଟିଭି ଭାରତ