ସରିଲା ଶାରଦୀୟ ପୂଜା, ନଦୀପଠାରେ ଜମିଲା କୁଢକୁଢ ଆବର୍ଜନା

ସରିଛି ଶାରଦୀୟ ଦୁର୍ଗା ପୂଜା । ସାଥୀରେ ସରିଛି ମହାମାୟୀଙ୍କ ଭସାଣି ଯାତ୍ରା । ଆଉ ଏବେ ନଦୀ ପଠାରେ ଜମିଛି କୁଢ କୁଢ ଅଳିଆ । ଅସତ୍ୟ ଉପରେ ସତ୍ୟର ବିଜୟ ବାର୍ତ୍ତା ନେଇ ଧରାପୃଷ୍ଠକୁ ଆସିଥିବା ଜଗତଜନନୀ ବିଦାୟ ନେଇଛନ୍ତି ସତ ପରିବେଶକୁ ପ୍ରଦୂଷଣମୁକ୍ତ କରିବାରେ ଫେଲ ମାରିଛି ପ୍ରଶାସନ।

ଭୁବନେଶ୍ବର: ସରିଛି ଶାରଦୀୟ ଦୁର୍ଗା ପୂଜା । ସାଥୀରେ ସରିଛି ମହାମାୟୀଙ୍କ ଭସାଣି ଯାତ୍ରା । ଆଉ ଏବେ ନଦୀ ପଠାରେ ଜମିଛି କୁଢ କୁଢ ଅଳିଆ । ଅସତ୍ୟ ଉପରେ ସତ୍ୟର ବିଜୟ ବାର୍ତ୍ତା ନେଇ ଧରାପୃଷ୍ଠକୁ ଆସିଥିବା ଜଗତଜନନୀ ବିଦାୟ ନେଇଛନ୍ତି ସତ ପରିବେଶକୁ ପ୍ରଦୂଷଣମୁକ୍ତ କରିବାରେ ଫେଲ ମାରିଛି ପ୍ରଶାସନ। ଫଳରେ ଭସାଣି ପରେ ଏବେ ବି ନଦୀ କୂଳରେ ପଡି ରହିଛି କୁଢ କୁଢ ଅଳିଆ ଆବର୍ଜନା ।

ଏ ଦୃଶ୍ୟ ହେଉଛି ସ୍ଥାନୀୟ କୂଆଖାଇ ନଦୀପଠାର । ଚଳିତବର୍ଷ ଭସାଣି ପରେ କୃତ୍ରିମ ପୋଖରୀକୁ ସଫା କରି ଅଳିଆ ଆବର୍ଜନାକୁ ଅନ୍ୟତ୍ର ପକାଇବା ପାଇଁ ନିଷ୍ପତ୍ତି ନିଆଯାଇଥିବା ବେଳେ ଏଠାରେ କାର୍ଯ୍ୟକାରୀ ହୋଇ ପାରିନାହିଁ ସେହି ଯୋଜନା । ବୁଧବାର ରାଜଧାନୀର ପ୍ରାୟ 150ରୁ ଉର୍ଦ୍ଧ୍ବ ମେଢ ଏହି କୂଆଖାଇ ନଦୀ କୂଳରେ ଏକ କୃତ୍ରିମ ପୋଖରୀରେ ବିସର୍ଜନ କରାଯାଇଥିଲା । ହେଲେ ବିସର୍ଜନକୁ 12 ଘଣ୍ଟା ବିତିଥିଲେ ସୁଦ୍ଧା ପ୍ରଶାସନ ପକ୍ଷରୁ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇନାହିଁ ।

ଅନ୍ୟପକ୍ଷରେ ରାଜ୍ୟ ପ୍ରଦୂଷଣ ନିୟନ୍ତ୍ରଣ ବୋର୍ଡର ନିଷ୍ପତି ଅନୁଯାୟୀ କୁତ୍ରିମ ପୋଖରୀର ପାଣିକୁ ପ୍ରଥମେ ପରୀକ୍ଷା କରାଯିବ, ତା’ପରେ ସେହି କୁତ୍ରିମ ପୋଖରୀକୁ ବାଲି ସାହାଯ୍ୟରେ ପୋତି ଦିଆଯିବା ନେଇ ନିଷ୍ପତି ନିଆଯାଇଛି। ତେବେ କୁଢ କୁଢ ଅଳିଆ ପଡିଥିବା ନଦୀପଠାକୁ କେବେ ସଫା କରିବ ପ୍ରଶାସନ ତାହା ଦେଖିବାର ଅଛି।

ସୂଚନା ଅନୁଯାୟୀ, ରାଜଧାନୀର କୂଆଖାଇ ନଦୀ ଘାଟରେ ଦୁଇଟି କୁତ୍ରିମ ପୋଖରୀ କରାଯାଇଛି। ଯେଉଁଠାରେ କ୍ରେନ ସାହାଯ୍ୟରେ ମୂର୍ତ୍ତିକୁ ବିସର୍ଜନ କରାଯାଉଥିଲା। ଯେପରି ନଦୀ ଜଳ ଦୂଷିତ ନହୁଏ ସେଥିପ୍ରତି ପ୍ରଶାସନ ଧ୍ୟାନ ଦେଇଥିଲା। ହେଲେ ଭସାଣି ପରେ ପୁଣି ଶୋଇ ପଡିଛି ପ୍ରଶାସନ।

ଭୁବନେଶ୍ବରରୁ ବିକାଶ ଦାସ, ଇଟିଭି ଭାରତ