ଭୁବନେଶ୍ବର: ପୁଣି ଲୋକଙ୍କ ସେବା ପାଇଁ ଆଗେଇ ଆସିଲେ ଅଭିନେତା ସବ୍ୟସାଚୀ ମିଶ୍ର । ଅନଲାଇନରେ କୋରୋନା ରୋଗୀଙ୍କୁ ଯୋଗାଇବେ ଚିକିତ୍ସା ସାହାଯ୍ଯ । ଆବଶ୍ୟକୀୟ ଚିକିତ୍ସା ସାମଗ୍ରୀର ଅଭାବ ଯୋଗୁଁ କୋରୋନା ରୋଗୀଙ୍କ ପ୍ରାଣହାନୀ ଘଟୁଥିବାବେଳେ ଏନେଇ ସବ୍ୟସାଚୀ ଏକ ଅନଲାଇନ ଫର୍ମ ତିଆରି କରିଛନ୍ତି । ଯାହା ମାଧ୍ୟମରେ ରୋଗୀଙ୍କ ବିବରଣୀ ଓ ସେମାନଙ୍କ ଜରୁରୀକାଳୀନ ଆବଶ୍ୟକତାକୁ ଜାଣି ତାଙ୍କୁ ବ୍ୟକ୍ତିଗତ ଭାବେ ସାହାଯ୍ୟ କରିବେ ।
ସଙ୍କଟ ସମୟର ସାଥୀ ସବ୍ୟସାଚୀ, ଅନଲାଇନରେ ସାହାର୍ଯ୍ୟ ପାଇବେ କୋରୋନା ପ୍ରଭାବିତ
ଏନେଇ ସବ୍ୟସାଚୀ କହିଛନ୍ତି, ଆମେ ଏକ କଠିନ ସମୟ ଦେଇ ଗତି କରୁଛେ । ଗତ କିଛିଦିନରୁ ମୁଁ ସୋସିଆଲ ମିଡିଆରେ ଶତାଧିକ କୋଭିଡ୍ ଆକ୍ରାନ୍ତ ଏବଂ ସେମାନଙ୍କ ସମ୍ପର୍କୀୟଙ୍କ ଠାରୁ ଆଇସିୟୁ ବେଡ୍, ଅମ୍ଳଜାନ ଓ ଔଷଧ ପାଇଁ ଅନୁରୋଧ ପାଉଛି । ମୁଖ୍ୟତଃ ଦିଲ୍ଲୀ, ମହାରାଷ୍ଟ୍ର, ଗୁଜୁରାଟ ଆଦି ରାଜ୍ୟରୁ ଏହି ଘଟଣା ସାମ୍ନାକୁ ଆସୁଛି । ତେବେ ସେମାନଙ୍କ ଅନୁରୋଧର ଯଥାସମ୍ଭବ ସମାଧାନ ପାଇଁ ମୁଁ ସମସ୍ତ ଚେଷ୍ଟା କରୁଛି ।