ସାବଧାନ ! ଜରି ଗୋଟାଳି ନୁହେଁ ସେ ଲୁଟେରା

ଜରି ଗୋଟାଳି ବାହାନାରେ ବିଭିନ୍ନ ସ୍ଥାନରେ ଲୁଟି ଚାଲିଛନ୍ତି ଲୁଟେରା ।

ଭୁବନେଶ୍ବର: କମିଶନରେଟ ପୋଲିସ ହାତରେ ୩ କୁଖ୍ଯାତ ଚୋର। ଜରି ଗୋଟାଇବା ବାହାନାରେ ଘରେ ପଶି ଲୁଟପାଟ କରନ୍ତି ଏହି ଲୁଟେରା ମାନେ। ରାତି ଅଧରେ ଘରେ ପଶି ଗ୍ରିଲ ତାଡି ସୁନା ଗହଣା ଆଦି ଦାମୀ ସାମଗ୍ରୀ ଚୋରି କରନ୍ତି। ସେହିଭଳି ଚନ୍ଦ୍ରଶେଖରପୁର ଥାନା ଅଞ୍ଚଳରେ ଏମିତି ଢଙ୍ଗରେ ଚୋରି କରିଥିବା ଗ୍ଯାଙ୍ଗର ୩ ସଦସ୍ଯଙ୍କୁ ଗିରଫ କରିଛି ପୋଲିସ ।

ସେମାନଙ୍କ ନିକଟରୁ ୬୧ ଗ୍ରାମ ସୁନା ଗହଣା, ୧୬୨ ଗ୍ରାମ ରୁପା ଗହଣା, ୪ଟା ଏଲଇଡି, ଗୋଟିଏ କ୍ଯାମେରା, ଗୋଟିଏ ମୋବାଇଲ ଓ ଗୋଟିଏ ବାଇକ ଜବତ କରିଛି ପୋଲିସ। ପରେ ସେମାନଙ୍କୁ ପଚରାଉଚରା କରିବା ପରେ ଉକ୍ତ ଗ୍ଯାଙ୍ଗରେ ୫ ସଦସ୍ଯ ରହିଥିବା ଜାଣିବାକୁ ପାଇଛି।

ସେମାନଙ୍କ ମଧ୍ଯରୁ ମାଷ୍ଟରମାଇଣ୍ଡ ଆଖଣ୍ଡଳବସ୍ତିର ଶଙ୍କର ଦାସ ସହ ଦୁଇ ସହଯୋଗୀ କାହ୍ନା ଦାସ ଓ ଶାନ୍ତିପଲି ବସ୍ତିର ଅର୍ଜୁନ ରାଓକୁ ଗିରଫ କରିଛି କମିଶନରେଟ ପୋଲିସ। ଏମାନଙ୍କ ନାଁରେ ଚନ୍ଦ୍ରଶେଖରପୁର ଥାନାରେ ୫ରୁ ଉର୍ଦ୍ଧ୍ବ ମାମଲା ରହିଥିବା ବେଳେ ରାଜଧାନୀର ବିଭିନ୍ନ ଥାନାରେ ମୋଟ ୧୫ରୁ ଉର୍ଦ୍ଧ୍ବ ମାମଲା ରହିଛି। ଏହି ଘଟଣାରେ ଅନ୍ଯ ଦୁଇ ସହଯୋଗୀଙ୍କୁ ଖୋଜୁଛି ସ୍ପେଶାଲ ସ୍କ୍ବାର୍ଡ ।

ତେବେ ଏମାନେ ଅନେକ ସମୟରେ ଜରି ଗୋଟାଳି ବାହାନାରେ ବିଭିନ୍ନ ଆଡେ ବୁଲନ୍ତି । ଯେଉଁ ଘର ତାଲା ପଡିଥାଏ ସେହି ଘର ଦେଖି ଚୋରି କରନ୍ତି।

ଭୁବନେଶ୍ବରରୁ ତାପସ ପରିଡା, ଇଟିଭି ଭାରତ