ଭୁବନେଶ୍ବର: ରାଜ୍ୟରେ କୋଭିଡ ଭେଣ୍ଟିଲେଟର (ventilator) ଓ ଆଇସିୟୁ(ICU) ମେସିନ କେଳେଙ୍କାରୀ ମାମଲା । ରିମାଣ୍ଡରେ ଆସିଲେ ଦୁଇ ଅଭିଯୁକ୍ତ । କମିସନରେଟ ପୋଲିସ ମାମଲାରେ ସମ୍ପୃକ୍ତ ଲେବର କଣ୍ଟ୍ରାକ୍ଟର ଲିଙ୍ଗରାଜ ସାହୁ ଓ ମିଡିଲମ୍ୟାନ ପ୍ରମୋଦ ବିଶ୍ବାଳକୁ ଦୁଇ ଦିନିଆ ରିମାଣ୍ଡରେ ନେଇଛି । ରିମାଣ୍ଡ ସମୟରେ କିଛି ହାଇପ୍ରୋଫାଇଲ ହସ୍ପିଟାଲର ନାଁ ସାମ୍ନାକୁ ଆସିପାରେ ବୋଲି ଅନୁମାନ କରାଯାଉଛି । ରାଜ୍ୟ ସରକାରଙ୍କ ଭେଣ୍ଟିଲେଟର ଓ ଆଇସିୟୁ ମେସିନ ଚୋରି ମାମଲାରେ ମୋଟ ୬ ଜଣ ଗିରଫ ହୋଇଛନ୍ତି ।
ରାଜ୍ୟ ସରକାରଙ୍କ ସ୍ବାସ୍ଥ୍ୟ ବିଭାଗ ପକ୍ଷରୁ କୋଭିଡ ପରିଚାଳନା ପାଇଁ ଭେଣ୍ଟିଲେଟର ଓ ଆଇସିୟୁ ଭଳି କିଛି ଅତ୍ୟାଧୁନିକ ଯନ୍ତ୍ରପାତି ଆସିଥିଲା । ଏସବୁ ଜିନିଷ ଗୋଦାମରେ ଗଚ୍ଛିତ ରଖାଯାଇଥିଲା । ହେଲେ କିଛି ଘରୋଇ ହସ୍ପିଟାଲ ମାଲିକ ଓ ଡାକ୍ତର ମିଶି ଗୋଦାମ ଚାର୍ଜରେ ଥିବା ସିକ୍ୟୁରିଟି ଗାର୍ଡ ଓ ସୁପରଭାଇଜଙ୍କ ଜରିଆରେ କୋଟି କୋଟି ଟଙ୍କାର ଭେଲ୍ଟିଲେଟର ଓ ଆଇସିୟୁ ମନିଟର ଚୋରି କରିଥିଲେ ଏବଂ ନିଜ ହସ୍ପିଟାଲରେ ବ୍ୟବାହର କରୁଥିଲେ । ଏ ସଂକ୍ରାନ୍ତରେ ଦାୟିତ୍ବରେ ଥିବା ସ୍ବାସ୍ଥ୍ୟ ବିଭାଗ ଅଧିକାରୀ କ୍ୟାପିଟାଲ ଥାନାରେ ଅଭିଯୋଗ ପରେ ଘଟଣାର ଖୁଲାସା କରିଛି ପୋଲିସ ।