ଭଦ୍ରକ:ଜିଲ୍ଲା ଦେଇ ପ୍ରବାହିତ ବୈତରଣୀ ନଦୀପଠାରୁ ବାଲି ଚାଲାଣ ଅନୁମତିକୁ ନେଇ ସ୍ଥାନୀୟ ଲୋକଙ୍କ ମଧ୍ୟରେ ଅସନ୍ତୋଷ ବଢିବାରେ ଲାଗିଛି । ଆଉ ତା ସହିତ ଅଞ୍ଚଳରେ ଉତ୍ତେଜନା ବଢିବାରେ ଲାଗିଛି । ଏଭଳି ଘଟଣା ଦେଖିବାକୁ ମିଳିଛି ଭଦ୍ରକ ଜିଲ୍ଲା ଭଣ୍ଡାରିପୋଖରୀ ବ୍ଲକ ବାଲିପୋଖରୀ ପଞ୍ଚାୟତରେ । ବୈତରଣୀ ନଦୀର ବାଲିପୋଖରୀ ଏସକେପ ଓ ଆଖୁଆପଦା ଆନିକଟ ନିକଟରୁ ବାଲି ଉଠାଣକୁ ସ୍ଥାନୀୟ ତହସିଲଦାର ପ୍ରଥମ କରି ନିଲାମ କରିଛନ୍ତି ।
ବେଆଇନ ବାଲି ଉଠାଣକୁ ବିରୋଧ କରି ସ୍ଥାନୀୟ ବାସିନ୍ଦାଙ୍କ ଗଣଧାରଣା
ତେବେ ଏହି ନିଲାମ ସମ୍ପୁର୍ଣ୍ଣ ବେଆଇନ ଭାବେ କରାଯାଇଥିବା ନେଇ ଅଭିଯୋଗ କରି ଗ୍ରାମବାସୀ ଓ ସ୍ଥାନୀୟ ଲୋକ ପ୍ରତିନିଧି ମାନେ ମିଶି ସେଠାରୁ ବାଲି ଉଠାଣକୁ ଜୋରଦାର ବିରୋଧ କରି ବାଲି ଉଠାଣକୁ ବନ୍ଦ କରିଦେଇଛନ୍ତି । ଏପରିକି ଏହି ବେଆଇନ ବାଲି ଉଠାଣ ଯୋଗୁଁ ବାଲିପୋଖରୀ ଏସକେପ ସହିତ ଆଖୁଆପଦା ଠାରେ ଥିବା ପୁରାତନ ବୈତରଣୀ ଆନିକଟ ସଂପୂର୍ଣ୍ଣ ଭୁଶୁଡି ପଡିବା ସହିତ ନଦୀ ନିଜର ଗତିପଥ ବଦଳାଇବାର ଯଥେଷ୍ଟ ଆଶଙ୍କା ସୃଷ୍ଟି ହେବାନେଇ ସୂଚନା ମିଳିଛି ।