ଆସନ୍ତା ଜାନୁଆରୀ 8ରେ ଦେଶବ୍ୟାପୀ ଗର୍ଜିବ ଟ୍ରେଡ ୟୁନିଅନ

ଗତ କିଛି ଦିନ ମଧ୍ୟରେ ଦେଶର ଶ୍ରମିକ ଓ କର୍ମଚାରୀଙ୍କ ଉପରେ ଜୁଲମ ବଢୁଥିବା ପରିଲକ୍ଷିତ ହେଉଛି । ତେବେ ସରକାରଙ୍କ ଭୁଲ ନୀତି ବିରୋଧରେ ଆସନ୍ତା ଜାନୁଆରୀ 8ରେ ସର୍ବ ଭାରତୀୟ ଧର୍ମଘଟ ଡାକରା ଦିଆଯାଇଛି ।

ବ୍ରହ୍ମପୁର: ଗତ କିଛି ଦିନ ମଧ୍ୟରେ ଦେଶର ଶ୍ରମିକ ଓ କର୍ମଚାରୀଙ୍କ ଉପରେ ଜୁଲମ ବଢୁଥିବା ପରିଲକ୍ଷିତ ହେଉଛି । ଶ୍ରମିକମାନଙ୍କ ଉପରେ ଆକ୍ରମଣ ହେଉଛି ଏବଂ ସର୍ବନିମ୍ନ ମଜୁରୀ ବୃଦ୍ଧି ମଧ୍ୟ ହେଉନି । ଏନେଇ ସରକାର ବାରମ୍ବାର ଭୂଆଁ ବୁଲାଉଛନ୍ତି । ତେବେ ସରକାରଙ୍କ ଭୁଲ ନୀତି ବିରୋଧରେ ଆସନ୍ତା ଜାନୁଆରୀ 8ରେ ସର୍ବ ଭାରତୀୟ ଧର୍ମଘଟ ଡାକରା ଦେଇଛି ଟ୍ରେଡ ୟୁନିଅନ ।

ଏଭଳିକି କେନ୍ଦ୍ର ସରକାରଙ୍କ ଜନ ବିରୋଧୀ ଆର୍ଥିକ ନୀତି, କର୍ପୋରେଟଙ୍କ ସ୍ଵାର୍ଥରେ ଶ୍ରମ ଆଇନ ଉପରେ ଆକ୍ରମଣ ନେଇ ଦେଶର ପ୍ରମୁଖ ଶ୍ରମିକ ସଙ୍ଗଠନମାନଙ୍କ ପକ୍ଷରୁ ହେବାକୁ ଥିବା ଏହି ଧର୍ମଘଟରେ ସରକାରଙ୍କ ଉପରେ ଚାପ ପକାଇବେ ଦେଶର ବିଭିନ୍ନ ଟ୍ରେଡ ୟୁନିଅନ ।

ଏହି ଅବସରରେ ବ୍ରହ୍ମପୁର ସହରରେ ସ୍ଥାନୀୟ ଗଞ୍ଜାମ କଳା ପରିଷଦ ପରିସରରେ ଆୟୋଜିତ ଶ୍ରମିକ ଓ କର୍ମଚାରୀଙ୍କ କନଭେନସନ କାର୍ଯ୍ୟକ୍ରମରେ ଗଞ୍ଜାମ, ଗଜପତି ଓ ରାୟଗଡା ପରି ଦକ୍ଷିଣ ଓଡିଶାର ବିଭିନ୍ନ କ୍ଷେତ୍ରରେ କାମ କରୁଥିବା ଶ୍ରମିକ ଓ କର୍ମଚାରୀ ପ୍ରତିନିଧିମାନେ ଯୋଗ ଦେଇଥିଲେ ।

କନଭେନସନରେ ଯୋଗ ଦେଇ ହେବାକୁ ଥିବା ଧର୍ମଘଟକୁ ସଫଳ କରି କିଭଳି ସେହି ଦିନ ସମସ୍ତ ସ୍ଥାନରେ ରେଳ ରୋକଠାରୁ ଆରମ୍ଭ କରି ଧର୍ମଘଟକୁ ସଫଳ କରାଯିବ ସେନେଇ ଆଲୋଚନା କରାଯାଇଥିଲା ।

ବ୍ରହ୍ମପୁରରୁ ସମୀର ଆଚାର୍ଯ୍ୟ, ଇଟିଭି ଭାରତ