ବ୍ରହ୍ମପୁର:ଇଣ୍ଡିଆ ବୁକ ଅଫ ରେକର୍ଡ୍ସରେ ସ୍ଥାନ ପାଇଲା ଓଡ଼ିଆ କବିତା ପୁସ୍ତକ "ଅକ୍ଷରା" । ଗଞ୍ଜାମ ଜିଲ୍ଲାର ପୋଲସରା ଅଞ୍ଚଳର ଜଣେ ଶିକ୍ଷକ ଏହି ପୁସ୍ତକ ରଚନା କରିଛନ୍ତି । ଏହି ପୁସ୍ତକ ବର୍ତ୍ତମାନ ଓଡ଼ିଆ ସାହିତ୍ୟକୁ ନେଇ ସର୍ବଭାରତୀୟ ସ୍ତରରେ ନୂତନ ପରିଚୟ କରିଛି । ଓଡିଆ ବର୍ଣ୍ଣମାଳାର ୪୧ ଟି ଅକ୍ଷରକୁ ନେଇ ଅକ୍ଷରା ରଚନା ହୋଇଥିବା ନେଇ କହିଛନ୍ତି ପୁସ୍ତକ ରଚୟତା କୁଳମଣି ସାହୁ।
କୁଳମଣି ସାହୁ ଗଞ୍ଜାମ ଜିଲ୍ଲା ପୋଲସରା ହାତୀଓଟ ନୋଡାଲ ହାଇସ୍କୁଲର ଜଣେ ସହକାରୀ ଶିକ୍ଷକ ଭାବରେ କାର୍ଯ୍ୟରତ ଅଛନ୍ତି । ପୂର୍ବରୁ ମଧ୍ୟ ସେ ବହୁ ନାଟକ, ଗଳ୍ପ ଓ ଗୀତି କବିତା ରଚନା କରିସାରିଛନ୍ତି। ତେବେ ଏହି ପୁସ୍ତକ ତାଙ୍କର ଏକ ଅନନ୍ୟ ରଚନା ଥିଲା। ଏଥିରେ ରଚନା କରଯାଇଥିବା କବିତାଗୁଡ଼ିକର ଏକ ବିଶେଷତ୍ବ ରହିଛି। ଗୋଟିଏ ଅକ୍ଷରରେ କବିତା ଆରମ୍ଭ ହୋଇଥିବା ବେଳେ ସେହି ଅକ୍ଷରରେ କବିତା ଶେଷ ହୋଇଛି । ଏହି ପୁସ୍ତକରେ ପୁରାଣଠାରୁ ଆରମ୍ଭ କରି ଇତିହାସ, ପ୍ରକୃତି ଓ ସାମାଜିକ ମୂଲ୍ୟବୋଧକୁ କବିତାର ପ୍ରସଙ୍ଗ ଭାବରେ ନିଆଯାଇଛି। ଏହି ପୁସ୍ତକର ପ୍ରତ୍ୟେକ କବିତାର ଶୀର୍ଷକ ଏବଂ ସମସ୍ତ ଧାଡିର ଆରମ୍ଭରେ ସେହି ଗୋଟିଏ ଅକ୍ଷର ବିନା ମାତ୍ରାରେ ବ୍ୟବହୃତ ହୋଇଛି।