ଭୁବନେଶ୍ବର: ବିଜେପିକୁ ଘାରିଛି ପିପିଲି ଉପନିର୍ବାଚନରେ ଶୋଚନୀୟ ପରାଜୟର ଭୟ । ଆସନ୍ନ ପରାଜୟ ଦେଖି ବିବ୍ରତ ଓ ହତାଶ ହୋଇ ବିଜେପି ମୁଖ୍ୟ ନିର୍ବାଚନ ଅଧିକାରୀଙ୍କ ନିକଟରେ ପୁଳାପୁଳା ମିଥ୍ୟା ଅଭିଯୋଗ ଆଣୁଛି । ଭିତ୍ତିହୀନ ଅଭିଯୋଗ କରି ଲୋକମାନଙ୍କୁ ଭ୍ରମିତ କରୁଛି । ଏମିତି କରି ଭୋଟ ହାତେଇବା ପାଇଁ ଷଡଯନ୍ତ୍ର କରୁଛି ବିଜେପି । ଆଜି ଏପରି ଢଙ୍ଗରେ ବିଜେପିକୁ ଘେରିଛି ବିଜେଡି । ସାମ୍ବାଦିକ ସମ୍ମିଳନୀରେ ବିଜେପିକୁ ଏଭଳି ଟାର୍ଗେଟ କରିଛନ୍ତି ବିଜେଡି ମୁଖପାତ୍ର ଶ୍ରୀମୟୀ ମିଶ୍ର ।
ଶ୍ରୀମୟୀ ଆହୁରି ମଧ୍ୟ କହିଛନ୍ତି ଏପରି ମିଥ୍ୟା ଓ ଭିତ୍ତିହୀନ ଅଭିଯୋଗ ଆଣିବା ବିଜେପିର ଅଭ୍ୟାସଗତ କାର୍ଯ୍ୟ । ଅଭ୍ୟାସଗତ ଭାବରେ ଅସତ୍ୟ ବକ୍ତବ୍ୟ ଦ୍ବାରା ଅପପ୍ରଚାରରେ ମାତିଛି । ବିଜେପି କର୍ମୀଙ୍କ ପାଖରୁ 50ଲକ୍ଷ ଟଙ୍କା ଧରାପଡ଼ିଛି । ବିଜେପି କର୍ମୀଙ୍କ ଦ୍ବାରା ମନ୍ତ୍ରୀ ସୁଶାନ୍ତ ସିଂହକୁ ଆକ୍ରମଣ କରାଯାଇଛି । ବିଜେଡି କର୍ମୀଙ୍କୁ ଆକ୍ରମଣ କରି ଗୁରୁତର ଆହତ କରିବା ଓ ତାଙ୍କ ପରିବାର ବର୍ଗଙ୍କ ସହ ଅଶାଳୀନ ଆଚରଣ କରିବା ପରେ ମଧ୍ୟ ବିଜେପିର ମୁହଁକୁ ଲଜ୍ୟା ନାହିଁ ବୋଲି କହିଛନ୍ତି ଶ୍ରୀମୟୀ ।