ବ୍ରହ୍ମପୁର: ଦିନକୁ ଦିନ ବଢିବାରେ ଲାଗିଛି ହାତୀ ଉପଦ୍ରବ । ଗଞ୍ଜାମ ଜିଲ୍ଲାର ଦିଗପହଣ୍ଡି ଅଞ୍ଚଳକୁ ପୁଣି ଥରେ ବାହୁଡିଛନ୍ତି ୧୫ଟି ହାତୀପଲ । ସୂଚନା ଅନୁଯାୟୀ ଗତ କିଛିଦିନ ଧରି ଏହି ହାତୀପଲ ଚିକିଟି ଅଞ୍ଚଳ ଜଙ୍ଗଲରେ ରହି ଖାଦ୍ୟ ଅନ୍ୱେଷଣରେ ଗାଁ ମୁହାଁ ହୋଇଥିଲେ । ଏପରିକି ହାତୀ ଉପଦ୍ରବ ଯୋଗୁଁ ବହୁ ଫସଲ ନଷ୍ଟ ହେବା ସହ ଜଣେ ବୃଦ୍ଧଙ୍କ ମୃତ୍ୟୁ ହୋଇଥିଲା । ତେବେ ଶନିବାର ରାତ୍ର ସମୟରେ ଏହି ହାତୀପଲ ଚିକିଟି ଅଞ୍ଚଳରୁ ଆସି ଦିଗପହଣ୍ଡି ବ୍ଳକର ବିଏଲଏନପୁର ଜଙ୍ଗଲରେ ରହୁଥିବା ଜଣାପଡିଛି ।
ରବିବାର ପାହାଡରୁ ତଳକୁ ହାତୀମାନେ ଓହ୍ଲାଇ ଉପଦ୍ରବ ଚଳାଇଥିବା ପୁଣି ଜଙ୍ଗଲ ମଧ୍ୟକୁ ଫେରିଥିବା ଗ୍ରାମବାସୀମାନେ ଅଭିଯୋଗ କରିଛନ୍ତି । ଏହି ହାତୀପଲରେ ଦୁଇଟି ଦନ୍ତା , ୯ଟି ମାଈ ଓ ଚାରିଗୋଟି ଛୁଆହାତୀ ଥିବା ଦିଗପହଣ୍ଡି ବନାଞ୍ଚଳ ଅଧିକାରୀ ସୂଚନା ଦେଇଛନ୍ତି । ଏହି ହାତୀପଲଙ୍କ ଗତିବିଧି ଲକ୍ଷ୍ୟ ପାଇଁ ୧୬ ଜଣ ବନ କର୍ମଚାରୀକୁ ନେଇ ଦୁଇଗୋଟି ସ୍କ୍ୱାର୍ଡରେ ବିଭକ୍ତ କରାଯାଇ ହାତୀପଲଙ୍କୁ ଜଗି ରହିଛନ୍ତି । ରବିବାର ବିଏଲଏନପୁର ଗାଁର କିଛି ଦୂରରେ ଥିବା ଜଙ୍ଗଲରେ ପ୍ରବେଶ କରିଥିବା ଜଣାଯାଇଛି ।