Airlift Operation: ସମୁଦ୍ରରେ ଫସିଥିବା ମତ୍ସ୍ୟଜୀବୀଙ୍କ ଉଦ୍ଧାର ପରେ ଜିଲ୍ଲାପାଳଙ୍କ ପ୍ରତିକ୍ରିୟା

କୋଷ୍ଟ ଗାର୍ଡଙ୍କ ସହାୟତାରେ ପ୍ରଥମେ ସ୍ଥାନୀୟ ଡଙ୍ଗା ସାହାଯ୍ୟରେ ତାଙ୍କୁ ଉଦ୍ଧାର କରିବା ପାଇଁ ପ୍ରୟାସ କରାଯାଇଥିଲା । କିନ୍ତୁ ସମୁଦ୍ର ଅଶାନ୍ତ ରହିଥିବାରୁ ଏହା ସଫଳ ହୋଇନଥିଲା । ପରେ ଭୂବନେଶ୍ବରରୁ ଏକ ଉଦ୍ଧାରକାରୀ ଦଳ ପହଞ୍ଚିଥିଲେ । ଅଧିକ ପଢନ୍ତୁ

ବ୍ରହ୍ମପୁର:ସମୁଦ୍ରରେ ଫସି ରହିଥିଲେ ମତ୍ସ୍ୟଜୀବୀ, କିପରି ହେଲେ ଉଦ୍ଧାର ସମସ୍ତ ଘଟଣା କହିଛନ୍ତି ଗଞ୍ଜାମ ଜିଲ୍ଲାପାଳ ବିଜୟ ଅମୃତା କୁଲାଙ୍ଗେ । ମତ୍ସ୍ୟଜୀବୀମାନେ ନୂତନ ମୋଟର ବୋର୍ଟ କ୍ରୟ କରି ଘରକୁ ଫେରୁଥିବା ବେଳେ ଗଭୀର ସମୁଦ୍ର ମଧ୍ୟରେ ଫସି ରହିଥିଲେ । ଗଞ୍ଜାମ ଜିଲ୍ଲାପାଳ ବିଜୟ ଅମୃତ କୁଲାଙ୍ଗେ ସାମ୍ବାଦିକ ସମ୍ମିଳନୀ ଜରିଆରେ ଉଦ୍ଧାର କାର୍ଯ୍ୟ ସମ୍ପର୍କରେ ସୂଚନା ଦେଇଛନ୍ତି ।

ଜିଲ୍ଲାପାଳ ବିଜୟ ଅମୃତ କୁଲାଙ୍ଗେ କହିଛନ୍ତି, "ରାଜ୍ୟ ସରକାରଙ୍କ ସହାୟତାରେ ମତ୍ସ୍ୟଜୀବୀଙ୍କୁ ଏୟାରଲିପ୍ଟ ଜରିଆରେ ଉଦ୍ଧାର କରାଯାଇଥିଲା । ଗଞ୍ଜାମ ପ୍ରଶାସନ ପାଇଁ ଏହି ଉଦ୍ଧାର କାର୍ଯ୍ୟ ଏକ ନୂତନ ଅଭିଜ୍ଞତା ସାଉଣ୍ଟି ପାରିଛି । ବ୍ଳକସ୍ତରରୁ ସ୍ବତନ୍ତ୍ର ରିଲିଫ କମିଶନର ଓ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ପର୍ଯ୍ୟନ୍ତ ନେଇ ସମସ୍ତ ସୂଚନା ପହଞ୍ଚିବା ପରେ ଉଦ୍ଧାର କାର୍ଯ୍ୟ ହୋଇଥିଲା । ସମସ୍ତ ଅଧିକାରୀଙ୍କ ମଧ୍ୟରେ ଉତ୍ତମ ସଂଯୋଜନା ଯୋଗୁଁ ଗଭୀର ସମୁଦ୍ରରେ ଫସିଥିବା ୧୧ଜଣ ମତ୍ସ୍ୟଜୀବୀଙ୍କୁ ସଠିକ ସମୟରେ ଉଦ୍ଧାର କରିବାରେ ସଫଳ ହୋଇଛି ।"

ଗଭୀର ସମୁଦ୍ର ମଧ୍ୟରେ ଏକ ବୋର୍ଟରେ କିଛି ମତ୍ସ୍ୟଜୀବୀ ଫସିଥିବା ସ୍ଥାନୀୟ ଲୋକେ ବ୍ଲକ ଏବଂ ଜିଲ୍ଲା ପ୍ରଶାସନକୁ ଅବଗତ କରାଇଥିଲେ । ଏହାପରେ କୋଷ୍ଟ ଗାର୍ଡଙ୍କ ସହାୟତାରେ ପ୍ରଥମେ ସ୍ଥାନୀୟ ଡଙ୍ଗା ସାହାଯ୍ୟରେ ତାଙ୍କୁ ଉଦ୍ଧାର କରିବା ପାଇଁ ପ୍ରୟାସ କରାଯାଇଥିଲା । କିନ୍ତୁ ସମୁଦ୍ର ଅଶାନ୍ତ ରହିଥିବାରୁ ଏହା ସଫଳ ହୋଇନଥିଲା । ପରେ ସମସ୍ତ ମତ୍ସ୍ୟଜୀବୀଙ୍କୁ ଏୟାରଲିପ୍ଟ କରିବା ପାଇଁ ଯୋଜନା କରାଯାଇଥିଲା ।

ଏହାପରେ ଭୂବନେଶ୍ବରରୁ ଏକ ଉଦ୍ଧାରକାରୀ ଦଳ ପହଞ୍ଚିଥିଲେ ଏବଂ ପାଖାପାଖି ୪୦ ମିନିଟ୍ ପରିଶ୍ରମ ପରେ ସମସ୍ତ ୧୧ଜଣ ମତ୍ସ୍ୟଜୀବୀଙ୍କୁ ସୁରକ୍ଷିତ ଭାବେ ଉଦ୍ଧାର କରାଯାଇଥିଲା । ଏନେଇ ବ୍ରହ୍ମପୁର ଉପ-ଜିଲ୍ଲାପାଳଙ୍କ କାର୍ଯ୍ୟାଳୟରେ ଏକ ସାମ୍ବାଦିକ ସମ୍ମିଳନୀରେ ସମସ୍ତ ସୂଚନା ପ୍ରଦାନ କରିଛନ୍ତି ଗଞ୍ଜାମ ଜିଲ୍ଲାପାଳ ।

ବ୍ରହ୍ମପୁରରୁ ସମୀର ଆଚାର୍ଯ୍ୟ, ଇଟିଭି ଭାରତ