ଏମକେସିଜି ମେଡିକାଲ କନିଷ୍ଠ କିରାଣୀଙ୍କ ଘରେ ଭିଜିଲାନ୍ସ ଚଢ଼ାଉ

କନିଷ୍ଠ କିରାଣୀ ଅଜିତ କୁମାର ସାହୁଙ୍କ ବାସଭବନ ସମେତ ଆଉ ପାଞ୍ଚଟି ସ୍ଥାନରେ ମଧ୍ୟ ବ୍ରହ୍ମପୁର ଭିଜିଲାନ୍ସ ପକ୍ଷରୁ ଚଢ଼ାଉ କରାଯାଇଛି ।

ବ୍ରହ୍ମପୁର: ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ ବ୍ରହ୍ମପୁର ଏମକେସିଜି ମେଡିକାଲର କନିଷ୍ଠ କିରାଣୀଙ୍କ ଘରେ ଭିଜିଲାନ୍ସ ଚଢ଼ାଉ । କନିଷ୍ଠ କିରାଣୀ ଅଜିତ କୁମାର ସାହୁଙ୍କ ବାସଭବନ ସମେତ ଆଉ ପାଞ୍ଚଟି ସ୍ଥାନରେ ମଧ୍ୟ ବ୍ରହ୍ମପୁର ଭିଜିଲାନ୍ସ ପକ୍ଷରୁ ଚଢ଼ାଉ କରାଯାଇଛି ।

ଅଜିତଙ୍କ ଆମ୍ବପୁଆ ଶିବପଦ୍ମା କଲେୋନୀ ଠାରେ ରହିଥିବା ଡ୍ୟୁପ୍ଳେକ୍ସ ଘରେ ଚଢାଉ କରାଯାଇଛି । ଏହା ସମେତ ଗଜପତି ନଗର ସପ୍ତମ ଲାଇନରେ ରହିଥିବା ତିନି ମହଲାକୋଠା ଘର , ମେଡିକାଲ ପରିସରରେ ରହିଥିବା ସରକାରୀ କାର୍ଯ୍ୟାଳୟ ସହ ଲାଞ୍ଜିପଲ୍ଲୀରେ ଥିବା ତିନି ମହଲା ଘର ଓ ଚନ୍ଦନା ଟ୍ରେଡର୍ସ ନାମକ ସିମେଣ୍ଟ ଗୋଦାମ ଉପରେ ମଧ୍ୟ ଏହି ଚଢ଼ାଉ କରାଯାଇଥିବା ଭିଜିଲାନ୍ସ ଏସପି ସୂଚନା ଦେଇଛନ୍ତି।

ଭିଜିଲାନ୍ସ ଟିମର ଏହି ଚଢ଼ାଉ ପରେ ଅନେକ ଗୁରୁତ୍ବପୂର୍ଣ୍ଣ କାଗଜପତ୍ର ଓ କେତେ ପରିମାଣର ସମ୍ପତ୍ତି ଠୁଳ ହୋଇଛି, ତାହା ସ୍ପଷ୍ଟ ହେବ ବୋଲି ଜଣାପଡିଛି ।

ବ୍ରହ୍ମପୁରରୁ ସମୀର ଆଚାର୍ଯ୍ୟ, ଇଟିଭି ଭାରତ