ବାରିପଦା: ରାଜ୍ୟରେ କୋରୋନା ସ୍ଥିତି ଅଣାୟତଃ ହେଉଥିବାବେଳେ କୋରୋନାରେ ପୀଡିତ ଜଣେ ଜୀବିତ ମହିଳାଙ୍କୁ ହସ୍ପିଟାଲ କର୍ତ୍ତୃପକ୍ଷ ମୃତ ଘୋଷଣା କରିଥିବା ଅଭିଯୋଗ ହୋଇଛି । ଏଭଳି ଏକ ସାଙ୍ଘାତିକ ଅଭିଯୋଗ ଆସିଛି ମୟୂରଭଞ୍ଜ ଜିଲ୍ଲା ରାଇରଙ୍ଗପୁର ଅଞ୍ଚଳରୁ ।
ବାରିପଦାସ୍ଥିତ ବାଙ୍କୀଷୋଳ କୋଭିଡ ହସ୍ପିଟାଲରେ ଗତ 7 ତାରିଖରେ ରାଇରଙ୍ଗପୁର ୱାର୍ଡ ନମ୍ବର 12 ଇଚିଣ୍ଡା ଅଞ୍ଚଳର ଜଣେ ମହିଳା କୋରୋନା ପଜିଟିଭ ଚିହ୍ନଟ ହୋଇଥିଲେ । ଏହା ପରେ ତାଙ୍କୁ ବାରିପଦାସ୍ଥିତ ବାଙ୍କୀଷୋଳ କୋଭିଡ ହସ୍ପିଟାଲରେ ଭର୍ତ୍ତି କରାଯାଇଥିଲା । ପରେ ୮ ତାରିଖ ଦିନ କୋରୋନାରେ ସମ୍ପୃକ୍ତ ମହିଳାଙ୍କ ମୃତ୍ୟୁ ଘଟିଥିବା ମେଡିକାଲ କର୍ତ୍ତୃପକ୍ଷ ପରିବାରଙ୍କୁ ଜଣାଇଥିଲେ । ମେଡିକାଲରୁ ଫୋନ ଯୋଗେ ମହିଳାଙ୍କ ମୃତ୍ୟୁ ଖବର ଜାଣିବା ପରେ ମୃତ ମହିଳାଙ୍କ ପ୍ରମାଣ ମାଗିଥିଲେ ପରିବାର ଲୋକ । ହେଲେ କର୍ତ୍ତୃପକ୍ଷ ସମ୍ପୃକ୍ତ ପରିବାରକୁ ମୃତ୍ୟୁ ଘଟିଥିବା କହି କୌଣସି ପ୍ରମାଣ ନଦେଇ ଫୋନ ରଖି ଦେଇଥିଲେ । ସେପଟେ ପରିବାର ଲୋକ ମହିଳାଙ୍କ ମୃତ୍ୟୁ ଖବରକୁ ବିଶ୍ୱାସ କରି ରୀତିନୀତି ଅନୁସାରେ ଶୁଦ୍ଧିକ୍ରିୟା କରିବା ନେଇ ପ୍ରସ୍ତୁତ ହୋଇଥିଲେ । କିନ୍ତୁ ଶୁକ୍ରବାର ଶୁଦ୍ଧି କ୍ରିୟା କରିବା ପାଇଁ ସମ୍ପୂର୍ଣ୍ଣ ପ୍ରସ୍ତୁତ ସରିଥିବାବେଳେ କୋଭିଡ ମେଡିକାଲର ଜଣେ କର୍ମଚାରୀଙ୍କ ଠାରୁ ଫୋନ ଯୋଗେ ଜାଣିବାକୁ ପାଇଥିଲେ ମହିଳାଙ୍କର ମୃତ୍ୟୁ ହୋଇନାହିଁ ବରଂ ସେ ଜୀବିତ ଅଛନ୍ତି । ପରେ ପରିବାର ଲୋକ ଶୁଦ୍ଧି କ୍ରିୟା ନକରି କୋଭିଡ ହସ୍ପିଟାଲ ଫାଟକ ନିକଟରେ ଶୁକ୍ରବାର ସନ୍ଧ୍ୟାରେ ପହଞ୍ଚି ଏନେଇ ହସ୍ପିଟାଲ କର୍ତ୍ତୃପକ୍ଷଙ୍କ ଜବାବ ମାଗିଥିଲେ । କର୍ତ୍ତୃପକ୍ଷ କୌଣସି ଉତ୍ତର ନଦେବାରୁ ରୋଗୀ ସମ୍ପର୍କୀୟ ଏବଂ ମେଡିକାଲ କର୍ମଚାରୀ ମଧ୍ୟରେ ପାଟିତୁଣ୍ଡ ଦେଖିବାକୁ ମିଳିଥିଲା ।