ବାଲେଶ୍ବର:ଲଘୁଚାପ ପ୍ରଭାବରେ ବିଭିନ୍ନ ଜିଲ୍ଲାରେ ବର୍ଷା ହୋଇଛି । ଫଳରେ ବାଲେଶ୍ଵରର ତିନି ପ୍ରମୁଖ ନଦୀରେ ଜଳସ୍ତର ବୃଦ୍ଧି ପାଇଛି । ଜଳକା ନଦୀରେ ଜଳ ବିପଦ ସଙ୍କେତ ଉପରେ ପ୍ରବାହିତ ହେଉଥିବାବେଳେ, ବସ୍ତା ଓ ସଦର ବ୍ଲକର ଅନେକ ପଞ୍ଚାୟତରେ ପାଣି ପଶିଛି । ତେବେ ରବିବାର ଜଳାର୍ଣ୍ଣବ ଅଞ୍ଚଳ ପରିଦର୍ଶନ କରି ସ୍ଥିତି ଅନୁଧ୍ୟାନ କରିଛନ୍ତି ବସ୍ତା ବିଧାୟକ ନିତ୍ୟାନନ୍ଦ ସାହୁ ।
ସୁବର୍ଣ୍ଣରେଖା ବଢାଉଛି ଚିନ୍ତା
ସୁବର୍ଣ୍ଣରେଖା ନଦୀର ସତର୍କ ସଂକେତ ଉପରେ 10.17ମି ଜଳ ପ୍ରବାହିତ ହେଉଥିବା ବେଳେ ଏହା ବିପଦ ସଂକେତ ଅତିକ୍ରମ କରି 11.50ମି ହୋଇପାରେ ବୋଲି ସତର୍କ ସୂଚନା ଜାରି କରାଯାଇଛି । ସୁବର୍ଣ୍ଣରେଖା ନଦୀରେ ପୁଣି ବନ୍ୟା ପରିସ୍ଥିତି ଉପୁଜିବା ନେଇ ଆଶଙ୍କା କରାଯାଉଛି । ବନ୍ୟା ସ୍ଥିତି ଉପୁଜିଲେ ବାଲିଆପାଳ, ଜଳେଶ୍ବର ଓ ଭୋଗରାଇ ବ୍ଲକରେ ବ୍ୟାପକ କ୍ଷୟକ୍ଷତି ହୋଇପାରେ । ଏହାକୁ ନେଇ ଆଗୁଆ ସଜାଗ ରହିଛି ଜିଲ୍ଲା ପ୍ରଶାସନ ।